Шабани во посета на училишта во Гостивар: Наставниците и учениците доследно да ги почитуваат мерките

Заменик-министерот за образование и наука Арафат Шабани и градоначалникот на Гостивар Арбен Таравари денес беа во работна посета на две општински училишта со цел запознавање со актуелната состојба со реализација на наставата. Заменик-министерот Шабани посочи дека со воспоставениот начин на учење од далечина, наставата успешно се спроведува и во време на пандемија. Во училиштата кои ги исполнуваат здравствените протоколи се реализира настава со физичко присуство и таму доследно се почитуваат протоколите и мерките за заштита.

„Постојано расте опфатот на ученици кои следат настава на далечина и поголемиот дел од учениците ги следат часовите онлајн, без никакви потешкотии. Заеднички, во соработка со градоначалниците и директорите тековно ги надминуваме предизвиците кои ги создава здравствената криза“, рече Шабани.

И во вонредни услови процесот на организирано учење продолжува, а најголема заслуга за успешниот старт на учебната година имаат наставниците кои со сиот свој капацитет се заложија за непречено одвивање на воспитно – образовниот процес. Она што во моментов е посебно важно е да се почитуваат протоколите и мерките за заштита и да се следат алгоритмите.

„Одговорност на МОН, директорите и наставниците е да има безбедни услови за одвивање на наставата во училиштата. Однесувањето надвор од училиштата е одговорност на родителите и учениците“, одговори Шабани на новинарско прашање. Тој уште еднаш повтори дека отворањето на училиштата за настава со физичко присуство е одлука на Владата. Исто така, апелираше за доследно почитување на мерките и одговорно однесување на сите.

„Мерките за заштита докажано функционираат но мора доследно да се почитуваат од сите. Од целокупното одговорно однесување ќе зависи и продолжувањето на наставата со физичко присуство во училиштата“, укажа заменик-министерот Шабани.

Според градоначалникот Таравари, работната посета била искористена за подетален увид во спроведувањето на воспитно-образовниот процес во Гостивар.

„Со заменик-министерот разговаравме за сите предизвици коишто ги имаме поврзано со одвивањето на наставата во нашата општина. Соработката со МОН се одвива на дневно ниво и во од се решаваат сите потреби“, рече Таравари.