Клоп, Чави и Зидан дебитираат како селектори

Новата сезона на Лигата на нации започнува во четврток, а првото коло носи неколку дебија кои ќе привлечат посебно внимание. Репрезентацијата на Македонија ќе дебитира во Б дивизијата, првиот меч ќе го одигра во сабота, против Швајцарија во Скопје. Во оваа група партиципираат и селекциите на Шкотска и Словенија.

Три легенди, Јирген Клоп, Зинедин Зидан и Чави Ернандез, ќе го одбележат првото коло, ќе дебитраат како селектори на три големи европски репрезентации.

Ќе биде особено интересно во Амстердам, каде што ќе се сретнат Холандија и Германија.

Чави ќе ги предводи „портокаловите“, додека од другата страна ќе биде Клоп, кој ја презеде репрезентацијата на својата земја.

Еден ден подоцна, на сцената излегува и Зидан. Еден од најголемите фудбалери во историјата на Франција ќе го започне својот мандат на клупата на „триколорите“ со гостувањето во Турција.

За сите тројца, Лигата на нации претставува само почеток на многу поголеми амбиции, но нивниот прв натпревар во нивните нови улоги веќе има посебна тежина.

Врската помеѓу Барселона и холандскиот фудбал трае со децении.

Од Ринус Михелс и Јохан Кројф, преку Луј ван Гал и Франк Рајкард, бројни Холанѓани оставија длабок белег во каталонскиот клуб.

Сега таа врска ќе ја продолжи Чави, легендата на Барселона, кој ја презеде холандската репрезентација.

„Сето ова е ново за мене, сакам да бидеме како семејство тука“, рече Чави Ернандез на почетокот на својот мандат.

Новиот селектор не сакаше да ветува конкретни резултати, но јасно го соопшти каков фудбал сака да го игра неговиот тим.

„Не можам да ветам резултати, но ќе работиме на резултати. Можам да ветам дека ќе играме со интензитет, страст и добар ритам. Ќе се обидеме да бидеме конкурентни и да ја преземеме иницијативата во играта“, рече Чави.

Во неговиот тим ќе биде и Вирџил ван Дајк, кој сега ќе мора да се навикне на необична ситуација – играјќи против својот поранешен тренер Јирген Клоп како капитен на Холандија.

Под водство на Клоп во Ливерпул, Ван Дајк стана во еден од најдобрите дефанзивци на својата генерација.

Заедно освоија речиси сè што можеа, а сега ќе бидат на спротивставени страни за прв пат.

Две години откако го напушти Ливерпул, Јирген Клоп најде нов предизвик.

„Ова е врвот, апсолутниот врв на мојата тренерска кариера. Ќе дадам сè што имам“, рече германскиот стручњак.

Германија има разочарувачки настап на неодамнешното Светско првенство, па една од првите задачи на новиот селектор ќе биде да го врати тимот на вистинскиот пат.

Прашањето е дали Клоп може да ја претвори репрезентацијата во тим кој ќе игра со енергијата и интензитетот по кои беше познат Ливерпул.

За Зинедин Зидан, преземањето на Франција не е само нова работа.

Тоа е можност која, како што вели, ја чекал со години.

„Во текот на последните четири или пет години имав неколку понуди од клубови, но ги одбив сите поради Франција“, откри Зинедин Зидан.

Франција е полна со индивидуален квалитет, но нивниот последен голем турнир покажа колку се важни организацијата и системот за успех.

Токму ова ќе се обиде да го донесе во тимот.

Неговиот прв натпревар на француската клупа ќе биде против Турција во Измир.

Покрај Клоп, Зидан и Чави, почетокот на новото издание на Лигата на нации ќе донесе уште неколку промени на клупите на големите репрезентации.

Роберто Манчини ќе започне нов мандат на клупата на Италија, Славен Билиќ ја презеде Хрватска, додека Жорж Жезус ќе дебитира како селектор на Португалија.

Белгија за прв пат ќе ја предводи поранешниот холандски репрезентативец Марк ван Бомел.

Прв ден, Лига на нации 1.коло:

А дивизија:

Холандија-Германија
Норвешка-Данска
Португалија-Велс
Србија-Грција

Б дивизија:

Австрија-Израел
Косово-Република Ирска

Д дивизија:

Андора-Малта
Лихтенштајн-Литванија.

Foto/ Depositphotos