пред 2 дена На 5 декември, Лас Вегас ќе биде домаќин на ждрепката за Светското првенство во 2026 година, кое ќе се одржи во САД, Канада и Мексико.
Иако ФИФА сè уште не го потврди датумот или локацијата на ждрепката, ESPN, повикувајќи се на добро информирани извори, тврди дека Лас Вегас е избран пред градовите кандидати од Канада и Мексико.
48-те земји учеснички ќе бидат поделени во 12 групи од по четири и тоа ќе биде прв пат светското првенство за фудбалери да вклучува дури 48 национални селекции, наместо вообичаените 32, и ќе се одржи во три земји домаќини, во САД, Канада и Мексико.
Домаќините на турнирот, Мексико (Група А), Канада (Група Б) и САД (Група Д), веќе се избрани за своите групи. Натпреварите ќе се играат во единаесет градови во САД, три во Мексико (Гвадалахара, Мексико Сити и Монтереј) и два во Канада (Торонто и Ванкувер).
Локациите за натпревари во САД се поделени во три региони. Њујорк/Њу Џерси, Филаделфија, Бостон, Мајами и Атланта се дел од Источниот регион, Канзас Сити, Далас и Хјустон се дел од Централниот регион, додека Лос Анџелес, Сиетл и областа на заливот Сан Франциско сочинуваат три од четирите градови во Западниот регион.
Стадионот „МетЛајф“ во Ист Радерфорд, Њу Џерси, ќе биде домаќин на финалниот натпревар на 19 јули 2026 година.
Лас Вегас претходно беше домаќин на ждрепката за Светското првенство во 1994 година, последниот пат кога турнирот се одржа во Соединетите Американски Држави.
