пред 2 часа Фудбалскиот клуб Манчестер Сити е прогласен за виновен за дури 114 од вкупно 115 точки од обвинението за кршење на финансиските правила на Премиер лигата, тврдат англиските медиуми.
Одлуката доаѓа три и пол години откако Премиер лигата поднесе обвинение против Сити во февруари 2023 година за наводно кршење на финансиските прописи во период од девет години, од 2009 до 2018 година и несоработка со истрагата.
Казната сè уште не е утврдена, додека се очекува Манчестер Сити да поднесе жалба на одлуката. Меѓу можните санкции се споменуваат парична казна, одземање бодови, па дури и исфрлање од Премиер лигата, но одлуката сè уште не е донесена, пишува „Атлетик“.
Од самиот почеток, Сити категорично ги отфрли сите обвинувања и тврдеше дека има докази што ја потврдуваат исправноста на работењето на клубот.
Сослушувањето пред тричлената независна комисија траеше 12 недели, од септември до декември 2024 година, по што долго се чекаше на конечниот исход од процесот.
Клубот сега издаде соопштение за „Атлетик“.
„Процесот во Премиер лигата е сè уште во тек, има значајни елементи што сè уште не се завршени и сè е предмет на строга доверливост. Затоа, ставот на Манчестер Сити останува ист како во изјавата од февруари 2023 година. Клубот совесно го почитува процесот осум години, верувајќи дека одборот и раководството на Премиер лигата ќе дејствуваат како независен, непристрасен и фер регулатор, без влијание од која било заинтересирана страна“.
Премиер лигата тврдеше дека Сити ги прекршил правилата што бараат доставување точни финансиски информации, што даваат вистинска и објективна слика за финансиската состојба на клубот.
Пеп Гвардиола, кој ја напушти клупата на Сити во мај, претходно јавно застана зад клубот и рече дека му верува на неговото раководство.
„Им верувам. Разговарав со нив и верувам во начинот на кој се однесуваа и работеа. Што се случи, се случи… Ќе се донесе одлука“, рече Гвардиола.
Нема индикации дека поранешниот тренер на Сити знаел за какви било можни неправилности во периодот од 2016 до 2018 година.
Тимот сега е под водство на Енцо Мареска, поранешниот помошник на Гвардиола, кој во јули изјави дека не е загрижен за процесот.
„Пред три години, во сезоната кога ја освоивме тројната круна, бев тука и тие го велеа истото. Три години подоцна, сè уште ги слушаме истите работи. Лично, не сум загрижен“, рече Мареска.
Foto/ Depositphotos
