Премиер лигата бара да се вратат навивачите на трибините

Англиската Премиер лига објави отворено писмо до британскиот премиер Борис Џонсон, барајќи да се дозволи итно враќање на фановите на стадионите и покрај пандемијата на корона вирусот.

Во писмото кое беше потпишано и од Англиската фудбалска лига (ЕФЛ), Фудбалската асоцијација (ФА) и Женската ФА, се тврди дека последните тест-мечеви покажале дека фановите можат безбедно да се вратат на стадионот во ограничен број.

Англиските фудбалски клубови планираа враќање на делумен број на навивачи на 1 октомври, но минатиот месец Џонсон објави нови мерки за спречување на ширењето на вирусот, по што постојат стравувања дека фанови ќе нема дури шест месеци. Во Германија, Франција и Италија на некои стадиони има по илјадници гледачи, и Премиер лигата бара да важат исти правила.

„Што побргу се вратиме на трибините, побргу ќе ги обединиме нашите заедници и ќе ги поддржиме локалните бизниси, но и националната економија. Ќе продолжиме да бараме од владата да ни дозволи безбедно враќање на навивачите. Музичките арени веќе добија дозвола за организирање на настани со социјално дистанцирање, и сега тоа треба да се дозволи и во фудбалот. На стадионите може да има безбедно присуство со одредени мерки – мерење на температура при влегување на стадионот, носење на заштитни маски и одредување на други правила за навивачите“, се вели во писмото.