Анчелоти: Само Алекс Фергусон може да ми даде совети

Селекторот на Бразил, Карло Анчелоти, одговори на критиките што ги добива од почетокот на Светското првенство, велејќи дека има само еден човек за кого верува дека е покомпетентен од него кога станува збор за фудбал.

Бразил се квалификуваше за осминафиналето на Светското првенство со победа од 2:1 над Јапонија, а триумфот донекаде ги замолчи критиките што го следеа искусниот италијански стручњак од почетокот на турнирот.

Иако „Селесао“ заврши прв во групата пред Мароко, Анчелоти беше критикуван за нерешениот резултат со Мароко (1:1).

Неговиот избор на играчи, одлуката да го стави на спискот за СП 34-годишниот Нејмар, како и фактот дека младиот Ендрик немаше место во почетниот состав, се најголемите замерки на јавноста во Бразил.

„Не знам дали разбирам фудбал или не, но никој друг не може да процени дали го разбирам. Единственото нешто што е сигурно е дека сум подготвил повеќе од 1.400 натпревари. Можеби не е доволно некој да каже дека разбирам фудбал, но тоа секако е огромно искуство“, рече Анчелоти.

Искусниот стручњак потоа истакна дека постои само една личност која има поголемо тренерско искуство од него.

„Можеби само еден човек подготвил повеќе натпревари од мене. Тоа е Алекс Фергусон, кој водеше повеќе од 2.000 натпревари. Секако дека ги слушам советите на сите, но единствениот кој навистина можеше да ми даде совет е Алекс Фергусон“, заклучи Анчелоти.

Foto/ Depositphotos