пред 2 часа Возачот на Мекларен, Ландо Норис, триумфираше на Големата награда на Унгарија – 11. трка од овогодинешниот шампионат во Формула 1.
Британецот ја забележа својата прва победа оваа сезона и прва откако минатата година стана шампион. Норис дојде до триумф со 15 секунди предност пред Макс Ферстапен во болидот на Ред Бул, додека третото место му припадна на возачот на Мерцедес, Кими Антонели.
Тимскиот колега на Норис, Оскар Пјастри, беше главниот ривал за победата, но мораше да се повлече поради проблеми со болидот. Австралијанецот претходно имаше контакт со Карлос Саинс Јуниор, кого го претекнуваше за цел круг, откако Шпанецот направи необјаснива грешка.
Она што ја обележа последната трка пред летната пауза беше и слаб старт на Џорџ Расел, кој успеа да се пробие до седмата позиција. Луис Хамилтон, рекордер по број на победи на „Хунгароринг“, се бореше за подиум, но поради казна за пребрз влез во бокс заврши петти, зад Шарл Леклер.
Пјастри поведе од стартот, искористувајќи грешка на Норис во кривината која од неодамна го носи името на Хамилтон. Возачите на Мекларен без проблеми се држеа пред ривалите, меѓу кои Ферстапен и Хамилтон. Антонели најдолго остана на патеката пред замена на гумите и накратко поведе, но Норис успеа да го стигне и претекне.
Клучниот момент се случи во 56. круг, кога Пјастри се повлече поради дефект. Следеше период на виртуелно безбедносно возило, а Норис и Хамилтон заменија гуми, додека Ферстапен и Антонели останаа на патеката. Ферстапен се проби на второто место, а Антонели и Хамилтон водеа голема борба – решена со казна за Британецот.
На крајот, Леклер го претекна Хамилтон поради временската разлика, додека Исак Хаџар заврши шести. Расел беше седми, пред Лијам Лосон, а бодови освоија и Нико Хулкенберг и Арвид Линдблад.
Антонели пред летната пауза има 219 бодови на врвот од генералниот пласман, 50 повеќе од Хамилтон. Расел е трет со 160.
Следната трка во Формула 1 е Големата награда на Холандија во Зандворт од 21 до 23 август.
