Американскиот Конгрес разгледува закон за длабока воена интеграција меѓу САД и Израел

Американскиот Конгрес работи на нов предлог-закон кој предвидува досега невидено ниво на интеграција меѓу американската и израелската војска, потег што дел од аналитичарите го оценуваат како контроверзен и потенцијално проблематичен, пренесува онлајн новинарската платформа „Responsible Statecraft“.

Предлогот е вграден во Законот за одобрување на националната одбрана (NDAA) за 2027 година, чија верзија е објавена од Претставничкиот дом.

Клучниот дел од предлогот е членот 224, кој се однесува на иницијатива за воено-технолошка соработка меѓу САД и Израел.

Според документот, предвидена е проширена соработка во истражување и развој, заедничко производство на оружје, заеднички инвестиции, лиценцирање и други форми на интеграција меѓу одбранбените индустрии на двете земји.

Во извештајот се потсетува дека од 1948 година САД му имаат обезбедено на Израел воена помош во вредност од околу 200 милијарди долари, прилагодено според инфлацијата.

Интеграција на податоци и заеднички системи

Според анализата на „Responsible Statecraft“, новата одредба би можела значително да ја прошири соработката во речиси сите области на современата воена технологија, вклучувајќи вештачка интелигенција, кванта технологија, автономни системи, сајбер-безбедност и биотехнологија.

Се предвидува и „интеграција на мрежи“ и „фузија на податоци“, што би значело поврзување и споделување на воени информации меѓу двете земји на многу повисоко ниво од досегашното.

Ако биде усвоен, законот би воспоставил најдлабока воено-индустриска поврзаност што САД ја имаат со која било друга држава.

Потенцијално засилување на израелското влијание

Дел од експертите предупредуваат дека ваквата интеграција би можела да му даде на Израел значително поголемо влијание во американскиот политички систем.

Според извештајот, заедничкото производство и отворањето работни места во САД би можеле да создадат дополнителни канали за политичко влијание, преку конгресмени од региони каде би се отвориле нови индустриски капацитети.

Се наведува дека слични производствени капацитети веќе постојат во американските сојузни држави Алабама и Мисисипи.

Критики за намалена транспарентност

„Responsible Statecraft“ предупредува дека предложената структура би можела да ја намали транспарентноста на американската воена помош кон Израел.

Според критичарите, наместо годишни одлуки и јавни гласања за воена помош, процесот би се префрлил во покомплексен систем на одбранбена набавка со ограничен надзор и намалена политичка одговорност.

Тие предупредуваат дека тоа би можело да го отежне демократскиот надзор врз воената соработка меѓу двете земји.

Политичка дебата во Конгресот

Предлог-законот веќе предизвикува поделени реакции меѓу американските конгресмени.

Дел од демократите и републиканците изразуваат критики за досегашното ниво на американска поддршка за Израел, додека други ја бранат стратешката соработка меѓу двете земји.

„Демократската партија им даде рефлексна и безусловна поддршка на израелските влади, дури и кога нивните постапки сè повеќе ги поткопуваат американските интереси и вредности“, изјави демократскиот сенатор Крис Ван Холен за „Њујорк тајмс“.

Републиканскиот претставник Томас Маси и поранешната претставничка Марџори Тејлор Грин отворено го осудија израелското лоби како „корозивно влијание“ врз американската политика, а политичките аналитичари веруваат дека таков став можеби, барем делумно, ги чинел места во Конгресот.

Според политички аналитичари, исходот од гласањето би можел да биде тесен, имајќи ги предвид растечките поделби во американската јавност околу надворешната политика на САД на Блискиот Исток.

Дебатата за овој закон доаѓа во период на засилени тензии и расправи за американската улога во конфликтите на Блискиот Исток, вклучително и војната во Газа и односите со Иран.

Предлогот, доколку биде усвоен, би значел значително продлабочување на воено-технолошката врска меѓу САД и Израел и нов модел на долгорочна стратешка соработка меѓу двете земји.

Текстот Американскиот Конгрес разгледува закон за длабока воена интеграција меѓу САД и Израел е превземен од МАКФАКС.