Вашингтон по поразот на Вучиќ: Очекуваме продолжување на партнерството со Србија

Американскиот Стејт департмент го поздрави учеството на граѓаните на Србија на парламентарните избори, наведувајќи дека со нетрпение го очекува продолжувањето и понатамошното унапредување на партнерството со новоизбраните пратеници во Народното собрание и со граѓаните на Србија, пренесува Радио Слободна Европа (РСЕ).

Портпаролот на Стејт департментот изјави дека се запознаени со прелиминарните резултати, вклучително и со признавањето на поразот од страна на поранешниот претседател Александар Вучиќ.

„Со нетрпение очекуваме да го продолжиме и дополнително да го унапредиме нашето партнерство со новоизбраните пратеници во Народното собрание на Србија и со граѓаните на Србија, надоврзувајќи се на напредокот постигнат во текот на изминатата година, меѓу другото и преку започнувањето на Стратешкиот дијалог“, се наведува во соопштението.

Според прелиминарните резултати од изборите одржани на 25 октомври, Студентската листа освоила 52,54 проценти од гласовите на излезените избирачи, додека „Обединета Србија“, предводена од Српската напредна партија и Александар Вучиќ, освоила 39,29 проценти.

Соединетите Американски Држави и Србија во средината на јули го започнаа Стратешкиот дијалог со цел продлабочување на соработката.

Двете земји тогаш, во рамките на Стратешкиот дијалог, потпишаа Меморандум за разбирање за енергетската инфраструктура и регионалната енергетска безбедност.

Средбата на американските и српските претставници на 17 јули ја отвори американскиот државен секретар Марко Рубио.

Текстот Вашингтон по поразот на Вучиќ: Очекуваме продолжување на партнерството со Србија е превземен од МАКФАКС.