Венс: Мировниот план мора да го зачува украинскиот суверенитет

Американскиот потпретседател Џеј Ди Венс порача дека мировниот план за Украина мора да го зачува украинскиот суверенитет. Претседателот Доналд Трамп ѝ даде рок на Украина до четврток да одговори на неговиот најнов мировен предлог, кој предвидува значајни уступки од Киев, меѓу нив повлекување од делови на источна Украина.

Венс на „Икс“ порача дека секој план мора да го запре крвопролевањето и да биде прифатлив и за Украина и за Русија. Тој ги критикуваше противниците на предлогот, велејќи дека погрешно го толкуваат или ја игнорираат реалноста на теренот.

Украинскиот претседател Володимир Зеленски вчера изјави дека Украина се соочува со „многу тежок избор: или да го загуби достоинството или да ризикува да го загуби клучниот партнер“, мислејќи на САД. Рускиот претседател Владимир Путин го прими планот позитивно, оценувајќи дека документот од 28 точки може да биде основа за мировно решение.

Европските лидери, меѓу кои германскиот канцелар Фридрих Мерц, како и лидерите на Франција, Италија и Обединетото Кралство, денес ќе одржат состанок на маргините на самитот Г20 во Јоханесбург за да го усогласат можниот одговор. Претседателката на Европската комисија Урсула фон дер Лајен го најави состанокот на „Икс“.

Текстот Венс: Мировниот план мора да го зачува украинскиот суверенитет е превземен од МАКФАКС.