„Го дестабилизиравте целиот регион“: Санчез со остри обвинувања кон САД и Израел

Шпанскиот премиер, Педро Санчез, пред Конгресот остро ја критикуваше воената акција на САД и Израел против Иран, која ја опиша како неправедна и незаконска војна. Санчез, кој долго и отворено се спротивставува на тој конфликт, изјави дека САД и Израел го поткопале меѓународното право, го дестабилизирале Блискиот Исток и повторно ги разгореле конфликтите во Ирак и Либан.

Шпанскиот лидер исто така изјави дека САД и Израел внесуваат несигурност во земјите од Заливот, кои, според него, станале особено ранливи поради одлуките на американскиот претседател Доналд Трамоп и израелскиот премиер Бенјамин Нетанјаху.

Санчез дополнително ги обвини САД и Израел дека ја зајакнуваат позицијата на рускиот претседател Владимир Путин во неговата сеопфатна инвазија врз Украина. Тој појасни дека Русија финансиски профитира благодарение на растечките цени на горивото и укинувањето на санкциите, за што е одговорна и американската администрација.

Шпанија во текот на целиот конфликт остана цврста во своето спротивставување на САД и Израел. Таа одби да им отстапи на Американците користење на поморската база Рота и воздушната база Морон, двете лоцирани во Андалузија, што го натера Трамп да изјави дека Шпанија нема одлично раководство и да побара САД да ја прекинат трговијата со таа земја.

Сепак, критиките на Трамп не го поколебаа Санчез во неговиот став.

„Да се биде сојузник или пријател значи да се биде лојален на принципите што ги споделуваме“, им порача на пратениците. „Тоа значи да се има храброст да се остане цврст кога се тргнува по погрешен пат“.

Текстот „Го дестабилизиравте целиот регион“: Санчез со остри обвинувања кон САД и Израел е превземен од МАКФАКС.