Здравствената заштита во Куба пропаѓа: лекари без ресурси, пациенти без грижа

Недостатокот и санкциите ја уриваат поранешната гордост на земјата – десетици илјади граѓани чекаат операции, а платите од 16 долари ги принудуваат лекарите да преземат дополнителни работни места, пишува „Вијести“.

Кубански лекар со повеќе од 25 години медицинска пракса, како и повеќето Кубанци кои примаат државна плата, мора да има дополнителна работа за да сврзе крај со крај, пишува медиумот..

За да избегне редовни прекини на електричната енергија, тој се буди во пет часот наутро за да готви ориз и грав за продажба, дополнувајќи го својот приход бидејќи трошоците за автобуси и такси ја надминуваат неговата месечна плата од 8.000 пезоси, или околу 16 долари.

Кубанскиот здравствен систем, кој долго време се сметаше за големо достигнување на револуцијата од 1959 година и децениите комунистичко владеење, е во јасен пад со години, бидејќи нестабилната економија и строгите економски санкции на САД земаат свој данок. Ова го пишува агенцијата Ројтерс, забележувајќи дека овој пад е дополнително забрзан поради ембаргото за нафта што САД го воведоа оваа година.

Во земја со 10 милиони жители, 96.000 Кубанци се на листата на чекање за операција, меѓу кои 11.000 деца, објави кубанското Министерство за јавно здравје. Министерството проценува дека до крајот на годината листата на чекање би можела да порасне на 160.000. Повеќе од 300 педијатриски операции неделно не можат да се извршат поради недостаток на лекови, кислород, анестезија и други медицински материјали. Околу 32.000 бремени жени можеби нема да го добијат препорачаниот минимум од три ултразвучни прегледи.

Ројтерс наведува дека овие податоци не ја одразуваат цената што ја плаќаат лекарите, медицинските сестри и другите здравствени работници, кои страдаат од прекини на електрична енергија и вода дома, а на работа се соочуваат со недостиг на лекови, нехигиенски услови и тешката задача да им кажат на пациентите дека не можат да им обезбедат исто ниво на грижа како порано.

Докторот, кој побара да остане анонимен од страв од одмазда, рече дека постојаниот стрес поради ограничувањето на здравствената заштита врши притисок врз него и му враќа спомени од најлошите денови од пандемијата на коронавирусот.

„Јавното здравство отсекогаш било ветувачко овде. Бесплатно. Систем од светска класа. Не знам колку долго можеме да го издржиме ова. Има сè помалку лекари, сè помалку ресурси за пациентите, но пациентите продолжуваат да доаѓаат.“

Иако кубанската економија има свои слабости, американските санкции дополнително ја ослабнаа позицијата на лекарите во земјата, познати како „армија на бели мантили“, пренесува медиумот.

Лекарите во државниот здравствен систем велат дека нивните колеги се исцрпуваат, ја напуштаат земјата или се откажуваат од своите месечни плати од 7.000 до 8.000 пезоси (околу 14 до 16 долари) за да работат во мали бизниси, како келнери или чистат куќи.

Лекарите кои зборуваа анонимно за Ројтерс велат дека нема доволно основни материјали, па затоа се принудени да носат средства за чистење од дома или да ги мијат подовите само со вода. Ракавиците за еднократна употреба, кои претходно се миеја и користеа повеќе пати, сега се целосно исчезнати.

Ова се совпадна со зголемувањето на случаите на хепатитис и дијареја, рекоа двајцата лекари. Ројтерс не можеше да потврди директна врска, но висок функционер на Министерството за здравство рече дека има зголемување на инфекциите поради недостаток на антибиотици.

Текстот Здравствената заштита во Куба пропаѓа: лекари без ресурси, пациенти без грижа е превземен од МАКФАКС.