Иран погуби маж обвинет за соработка со Израел

Маж обвинет за соработка со израелските тајни служби за време на големите протести во Иран во јануари беше погубен утрово, објавија иранските судски власти.

Егзекуциите во земјата зачестија од избувнувањето на војната, која започна со американско-израелски напад врз Иран на 28 февруари.

Ерфан Киани беше обесен по постапка одобрена од Врховниот суд, објави судското издание Мизан.

Во него Киани е опишан како еден од „главните ликови“ вклучени во „мисија организирана од Мосад“ за време на протестите што ја потресоа централната иранска покраина Исфахан.

Погубениот маж беше обвинет за „уништување на јавен и приватен имот, палење, поседување и користење молотови коктели, носење нож (мачета), блокирање патишта, напад врз полицајци и влевање страв кај граѓаните“.

Ова е деветто погубување во земјата од 19 март по обвиненија поврзани со јануарските протести.

Владата призна дека повеќе од 3.000 луѓе се убиени за време на протестите, а насилствата ги нарече „терористички акти“ предводени од САД и Израел.

Текстот Иран погуби маж обвинет за соработка со Израел е превземен од МАКФАКС.