Иран, сепак, сè уште не избрал нов врховен лидер

Иранските власти денеска објавија дека „прават сè што можат“ за што поскоро да назначат врховен лидер што ќе го наследи Али Хамнеи, и покрај израелските закани дека наследникот ќе биде цел на атентат.

„Правиме сè што можеме“, изјави за државната телевизија Ахмад Хатами, член на Собранието на експерти, телото одговорно за избор на новиот лидер.

„Со Божја волја, лидерот ќе биде назначен што е можно поскоро. Блиску сме до одлука, но сме во војна“, додаде тој, сугерирајќи дека процесот може да се одложи.

Медиумот „Иран Интернешнл“ синоќа објави дека Моџтаба Хамнеи, синот на убиениот ајатолах, е избран за нов врховен лидер, но процесот очигледно сè уште не е официјално завршен.

Израелскиот министер за одбрана изјави дека кој и да биде избран да го наследи покојниот врховен лидер Али Хамнеи, кој беше убиен во израелските и американските воздушни напади врз Техеран во саботата, ќе биде цел, според соопштението од неговиот кабинет.

„Со оглед на овој клучен елемент, потребно е да се дејствува дискретно“, нагласи Хатами, додавајќи дека изборот на нов лидер е „блиску“.

Собранието на експерти е составено од 88 членови, избрани со директно универзално гласање за осумгодишен мандат. Телото, исто така, ги надгледува активностите на врховниот лидер и може да го отстрани.

Вчера, според иранските медиуми, филијалата на институцијата во Ком, свет град јужно од Техеран, беше цел на израелски и американски воздушни напади. Ден претходно, седиштето на институцијата во Техеран беше цел на напади.

Иран официјално го започна процесот на транзиција во неделата по смртта на Али Хамнеи, кој го водеше Иран од 1989 година.

Иранскиот претседател Масуд Пазахстани, претседателот на Врховниот суд, Голамхосеин Мохсени Еџеи, и Алиреза Арафи, верски службеник и член на Собранието на експерти и Советот на чувари, се привремени лидери.

 

фото/Depositphotos

Текстот Иран, сепак, сè уште не избрал нов врховен лидер е превземен од МАКФАКС.