Несреќа во Шведска: Две лица загинаа на концерт во Стокхолм, еден човек падна од седми кат и усмрти друг

Две лица загинаа, а едно е повредено откако маж падна од седми кат во концертна сала во Шведска, непосредно пред почетокот на трибјут-концерт во чест на легендарниот шведски бенд „АББА“.

Околу 1,000 луѓе се собраа во Концертната и конгресна сала во Упсала во близина на главниот град Стокхолм во вторникот вечерта за да го гледаат шоуто посветено на бендот.

Но, 30 минути пред почетокот на настанот, човек паднал од голема висина во отвореното фоаје на приземјето.

„Човекот паднал над две лица“, соопшти полицијата, додавајќи дека починал на лице место.  Едно од лицата кои ги удрил при падот добило фатални повреди и починало. Третото лице останало со повреди кои не се опасни по живот и е пренесено во болница.

Ниту една од жртвите не е именувана од полицијата, но според полициски извори, човекот кој паднал бил на возраст од околу 80 години, а другиот околу 60.

„Добивме повик дека некој или скокнал или паднал од голема височина“, изјави портпаролот на полицијата Магнус Јансон Кларин за новинската агенција „АФП“.

Тој рече дека полицајците работат на утврдување што точно се случило, додавајќи дека е премногу рано да се каже дали се работи за кривично дело.

Концертната сала првично беше затворена од полицијата за да може да се сослушаат сведоците на местото на трагичниот инцидент.