Нетанјаху: Продолжуваме жестоко да го напаѓаме Иран

Израелскиот премиер, Бенјамин Нетанјаху, денес изјави дека Израел ќе продолжи жестоко да го напаѓа Иран и дека ќе одговори со уште поголема сила против проиранското движење Хезболах во Либан.

„Продолжуваме жестоко да го напаѓаме Иран. Нашите пилоти летаат над Иран и Техеран, како и над Либан. Хезболах направи огромна грешка со тоа што нè нападна. Веќе одговоривме со сила и ќе одговориме со уште поголема сила“, рече шефот на израелската влада за време на посетата на воздухопловната база Палмахим во централен Израел.

Израелската војска објави дека денес започнала серија напади врз инфраструктурата на Техеран, четвртиот ден од војната што ја води со САД против Исламската Република.

„Воздухопловните сили започнаа серија напади од големи размери врз инфраструктурата што му припаѓа на иранскиот терористички режим во Техеран“, се вели во соопштението на војската.

Новинската агенција „Тасним“ објави дека американски и израелски воени авиони го погодиле центарот на Техеран. Израелската војска, исто така, соопшти дека нападнала погони за производство на балистички ракети низ целиот Иран.

„За време на нападите низ Иран, израелската војска ги таргетираше индустриските погони што ги користи иранскиот режим за производство на оружје, особено балистички ракети“, се вели во соопштението.

Армијата прецизираше дека целта биле десетици локации во Исфахан во централен Иран, поврзани со мрежата на балистички ракети, особено лансери и магацини.

 

фото/Depositphotos

Текстот Нетанјаху: Продолжуваме жестоко да го напаѓаме Иран е превземен од МАКФАКС.