Планот на Зеленски на чекање: Седум членки на НАТО се против идејата Украина да стане дел од Алијансата

Седум членки на НАТО се против поканата на Украина за членство во Алијансата, објави бриселскиот портал „Политико“, повикувајќи се на четворица претставници на НАТО и на САД, како и на некои дипломати.

Германија и САД се најголемите земји кои се колебаат да одговорат на апелот на украинскиот претседател Володимир Зеленски Украина да биде поканета во НАТО, пишува бриселското издание „Политико“ и наведува дека Унгарија и Словачка исто така се против оваа одлука.

Другите земји, се додава, не сакаат брзо да одговорат на барањето на Киев и се кријат во сенка.

„Зад Соединетите Американски Држави и Германија се кријат земји како Белгија, Словенија или Шпанија. Едноставно не покажуваат никаква иницијатива“, изјави неименуваниот функционер на НАТО.

Иако овие земји теоретски ја поддржуваат идејата, „кога ситуацијата ќе се доближи до имплементација, тие ќе бидат јавно спротивставени“, објасни друг висок функционер.

Сепак, претставниците кои разговараа со новинарите истакнаа дека ниту САД ниту Германија го исклучуваат потенцијалното идно членство на Украина во НАТО.

Поканата на Украина во НАТО е првиот дел од „победничкиот план“ на Зеленски, кој тој го претстави пред европските лидери во Брисел на 17 октомври.

Генералниот секретар на НАТО Марк Руте изјави за време на неодамнешниот состанок на министрите за одбрана на НАТО дека Украина може да стане 33-та или 34-та членка на Алијансата.

Сепак, „Политико“ посочува дека НАТО се уште не одговорил на поканата на Зеленски.

Амбасадорот на САД во НАТО, Џулиен Смит на 16 октомври рече дека Алијансата не планира да ја покани Украина да се приклучи во блиска иднина.

Текстот Планот на Зеленски на чекање: Седум членки на НАТО се против идејата Украина да стане дел од Алијансата е превземен од МАКФАКС.