Полски туристи заглавени во Израел, планирана евакуација

Полска се подготвува да евакуира речиси 200 свои граѓани, кои се нашле во Израел како туристи или на кратка посета, изјави заменик-министерката за надворешни работи, Хенрика Мошчицка-Дендис, според „Ројтерс“.

„Претпоставуваме дека ќе бидеме подготвени во следните неколку десетици часа. Евакуацијата ќе се однесува на оние што се заглавени како туристи и на оние на краток престој“, изјави таа за новинарите. Евакуацијата треба да се изврши преку јорданската престолнина Аман.

Израел почна напад врз Иран во раните утрински часови во петокот привремено затворајќи го својот воздушен простор и повикувајќи ги жителите да останат таму каде што се, додека долгогодишните непријатели на Блискиот Исток разменија смртоносни напади.

Според Министерството за туризам, 40.000 туристи моментно се заробени во Израел. Авиокомпаниите ги откажуваат летовите до понатамошно известување, па патниците се принудени да одлучат дали да чекаат до крајот на конфликтот или да бараат скапи алтернативни патишта низ соседните земји.

Министерството за туризам отвори виртуелна услуга за помош на патниците, достапна на англиски и на хебрејски јазик 24 часа на ден. Но, за оние што останаа музеите се затворени до понатамошно известување, пристапот до Стариот град на Ерусалим е забранет за секој што не живее таму, а многу продавници остануваат затворени.

Текстот Полски туристи заглавени во Израел, планирана евакуација е превземен од МАКФАКС.