Путин: Средбата со Зеленски нема смисла

Рускиот претседател Владимир Путин изјави дека во моментов не гледа смисла да се сретне со украинскиот претседател Володимир Зеленски, како одговор на неговото претходно отворено писмо.

Зборувајќи на Меѓународниот економски форум во Санкт Петербург, Путин рече дека претходните директни средби не дале конкретни резултати. „Претходното искуство покажува дека ваквите средби служат за купување време. Ни требаат договори, а не средби“, рече Путин.

Тој додаде дека го прочитал писмото на украинскиот претседател дури откако портпаролот на Кремљ, Дмитриј Песков, му го привлече вниманието на него. Путин оцени дека писмото содржи елементи на грубост и ја доведе во прашање неговата вистинска намера. „Што е ова? Обид да се организира состанок или да се создадат услови во кои тоа станува невозможно?“, праша рускиот претседател.

Осврнувајќи се на наводите во писмото што се однесуваат на неговата возраст, Путин ги отфрли. „Авторот на писмото ги споменува моите години. Има луѓе постари од мене кои сè уште ги извршуваат своите должности. Најважни се ефикасноста и здравјето“, рече тој.

Тој, исто така, го повтори ставот на Москва дека изборите треба да се одржат во Украина, истакнувајќи дека мандатот на Зеленски истекол во мај 2024 година и дека изборите се одложени поради воена состојба. „Се согласувам дека изборите треба да се одржат. Узурпацијата на власта е кривично дело, нема потреба да се плашиме од избори“, рече Путин.

Рускиот претседател, исто така, го доведе во прашање одбивањето на Киев да прифати можни меѓународни гаранции како дел од идното мировно решение. „Не разбирам зошто не ги сакаат САД како гарант. Тие сакаат американско оружје, но не ги сакаат САД како гарант“, рече тој.

Конечно, тој се осврна на американскиот претседател Доналд Трамп, на кого рече дека е благодарен, истакнувајќи дека сè уште има работа што треба да се направи.

Текстот Путин: Средбата со Зеленски нема смисла е превземен од МАКФАКС.