Путин ѝ додели титула за херојство на бригадата која Украина ја обвини за масакрот во Буча

Рускиот претседател Владимир Путин ѝ додели почесна титула за херојство на 64-та моторизирана бригада, која Украина ја обвини за учество во злосторствата извршени во Буча, во близина на Киев.

Според Кремљ, Путин потпишал декрет за доделување на бригадата „почесна титула за херојството и истрајноста, одлучноста и храброста на нејзините членови“.

„ Умешното и одлучно дејствување на целиот тим (бригада) за време на специјалната воена операција во Украина е модел на извршување на воената должност, храброст, решителност и висок професионализам“, напиша Путин во обраќањето до армијата.

Кремљ не наведува каде е сега бригадата и дали е распоредена за друга мисија.

Украинските власти ја обвинија руската армија, особено 64-та моторизирана бригада, дека извршила масакр врз цивили во Буча, кој беше откриен на 30 март по повлекувањето на руските војници.

Руските власти ги демантираа информациите и ги обвинија украинските власти и западните медиуми за организирање на масакрот.