Семејството на починатиот Флојд бара усвојување на закон за полициска реформа

пред 3 години

Семејството на Џорџ Флојд, кој беше убиен од полицијата пред една година, денес се состана со американскиот претседател Џозеф Бајден во Белата куќа и повика на усвојување на закон за реформа на полицијата, што ќе го носи неговото име.

Тие се состанаа на првата годишнина од убиството на Флојд, а на состанокот не присуствуваше сестрата на Џорџ Флојд, која ја бојкотираше средбата, велејќи дека Бајден го прекршил ветувањето дека законот ќе биде донесен до годишнината од смртта на нејзиниот брат.

„Одев во Вашингтон кај Бајден за да го потпише предлог-законот, но тој не го потпиша”, рече таа.

По состанокот со семејството, претседателот издаде соопштение во кое ветува дека ќе продолжи да го поддржува законодавството.

„Битката за душата на Америка е постојано влечи-потегни прашање, помеѓу американскиот идеал дека сите сме создадени еднакви и суровата реалност дека расизмот нè разделува предолго“, рече претседателот, додавајќи дека е време да се усвои законот бидејќи помина една година откако е убиен Џорџ Флојд.

Флојд, 46-годишен црнец, кој почина со лисици додека полицаец му го притискаше вратот со коленото, стана лице на бурно национално соочување со историјата на расна неправда и полициска бруталност.

Неговите умирачки зборови „Не можам да дишам“ станаа слоганот на масовните демонстрации што ги потресоа САД и целиот свет.

Share
Scroll to Top