Јужна Кореја стана еден од главните снабдувачи на гориво за Русија

Гориво од Јужна Кореја пристигнува во Русија – делумно преку танкери кои се под санкции – во време кога Москва се соочува со недостиг на залихи поради војната во Украина. Анализата на пристанишните евиденции и податоците за следење на пловила открива дека, во текот на јули и август, повеќе од 176.000 тони гориво – првенствено дизел – биле натоварени на седум танкери во неколку јужнокорејски пристаништа. Овие пловила извршиле вкупно 14 патувања до рускиот Далечен Исток, пренесува „Гардијан“.

Три од седумте користени пловила биле предмет на санкции воведени од Обединетото Кралство и Европската Унија. Едно од нив го презело својот товар преку префрлање од брод на брод во јужнокорејските води. Ваквите методи можат да се користат за прикривање на потеклото на товарот и за да им се овозможи на пловилата да избегнат пристанување на пристанишните терминали.

„Шокантно е што танкери кои се под санкции на ЕУ натовариле гориво во јужнокорејски пристаништа и го транспортирале во Русија“, изјави Ајзак Леви, аналитичар во Центарот за истражување на енергија и чист воздух (CREA) со седиште во Финска. „Ова го поткопува режимот на санкции и поддршката на Јужна Кореја за Украина.“

Сеул испрати хуманитарна помош и несмртоносна воена опрема – како што се шлемови, панцири и возила за деминирање – во Украина. Во 2023 година, земјата исто така вети поддршка од 2,3 милијарди долари, првенствено во форма на заеми. И покрај тоа, Јужна Кореја долго време се обидува да постигне рамнотежа меѓу поддршката за Украина и желбата за подобрување на односите со Русија.

Капацитетот на Русија за преработка на нафта е значително намален поради нападите со украински беспилотни летала. Според податоците на Меѓународната агенција за енергетика, преработката во руските рафинерии во јуни паднала на најниско ниво во последните повеќе од 20 години.

Производството на дизел е намалено за речиси 30 отсто во споредба со минатата година. Украинската воена разузнавачка служба (ХУР) тврди дека Москва е принудена да увезува нафтени деривати за да ја снабдува својата воена машинерија.

Текстот Јужна Кореја стана еден од главните снабдувачи на гориво за Русија е превземен од МАКФАКС.