Велика Британија разгледува која вакцина ќе биде третата доза за стари лица и ранливи групи

Британски официјални лица разгледуваат кои вакцини против ковид-19 ќе обезбедат најдобра заштита за ранливите луѓе подоцна оваа година, но одлуката сè уште не е донесена, изјави денеска министерот за вакцини Надим Захави.

Велика Британија е втора земја во светот според стапката на вакцинација на населението против Ковид-19, а најмалку половина од возрасната популација ја прими првата доза.

Владата сега размислува за трета доза за вакцинирање на постари и ранливи групи наесен откако целата возрасна популација ја прими втората доза.

„Лекарите сè уште не одлучиле дали да се посветат на тоа за да обезбедат поголем имунитет за најранливите или да ја зголемат трајноста на заштитата, или пак да бараат варијанти“, изјави Захави за „Скај њуз“.

На прашањето дали луѓето постари од 50 години би добиле дополнителна засилена доза, Захави повтори дека сè уште не донеле одлука.

Како што коронавирусот мутира и се појавуваат нови, многу позаразни варијанти, како што се јужноафриканската и бразилската, предизвикот за експертите е дали постојните вакцини ќе бидат подеднакво ефикасни против нив.

За да се зголеми интензитетот на истражување на вакцините против новите варијанти, Велика Британија најави дополнителни 30 милиони фунти во истражувачката лабораторија во Портон Даун.

Министерот за здравство Мет Хенкок рече дека инвестицијата треба да и обезбеди на Велика Британија подобра заштита од заканите од нови варијанти на коронавирусот.