(Видео) Спектакуларна експлозија на небото над САД: метеор кој се движел со 120.000 км/ч предизвика силен тресок

Метеор кој се движел со брзина од неколку десетици илјади километри на час предизвика силен тресок и тресење на тлото, кое вчера попладне беше почувствувано ширум американската сојузна држава Масачусетс.

Американската вселенска агенција (НАСА) потврди дека над оваа држава, во 14:06 часот по локално време, пролетала огнена топка, односно исклучително сјаен метеор. Според проценките на експертите, тој се движел со брзина од околу 120.000 километри на час, а при неговото распаѓање била ослободена енергија споредлива со експлозија на приближно 300 тони ТНТ.

Распад на висина од 64 километри

Од НАСА појаснуваат дека небесното тело не е поврзано со ниту еден моментално активен метеорски рој, туку дека станува збор за спорадичен природен објект, отфрлајќи ги можностите за вселенски отпад или пак пад на вештачки сателит.

„Се чини дека метеорот се распаднал на висина од околу 64 километри над североисточниот дел на Масачусетс и југоисточниот дел на Њу Хемпшир“, соопштија од НАСА.

Паника кај граѓаните, но без материјална штета

Агенцијата за управување со вонредни состојби на Масачусетс објави дека службите за јавна безбедност примиле голем број дојави од вознемирени граѓани кои пријавиле „гласен тресок“ и тресење на земјата во источниот дел на државата. Сепак, надлежните информираат дека и покрај бројните повици, немало потреба од итни интервенции на полицијата или на противпожарните служби, бидејќи не се регистрирани материјални штети.

Американскиот геолошки институт го опиша настанот како „широко почувствуван звучен удар кој веројатно бил предизвикан од болит“ – термин кој во астрономијата се користи за исклучително сјајни метеори кои експлодираат во атмосферата.

Геолозите појаснија зошто граѓаните го почувствувале ова како тресење на земјата:

„За разлика од земјотресите, кои настануваат во одредена точка во внатрешноста на Земјата, настаните поврзани со звучен удар се создаваат долж линеарна патека низ атмосферата.“

Од Институтот исто така истакнаа дека нивните инструменти не забележале никаков вистински земјотрес, ниту пак постојат какви било докази дека некој дел од вселенскиот објект успеал да удри во тлото.

Текстот (Видео) Спектакуларна експлозија на небото над САД: метеор кој се движел со 120.000 км/ч предизвика силен тресок е превземен од МАКФАКС.