Во Австрија започна четвртото заклучување-затвoрени кафулиња, ресторани

Во Австрија денеска започна четвртото заклучување поради пандемијата со коронавирус, со што земјата стана првата западноевропска земја што повторно воведе драстична и непопуларна мерка оваа есен.

Повеќето од местата каде што се собираат луѓето, како ресторани, барови, театри и продавници, не можат да ги отворат вратите 10 дена, но владата вели дека заклучувањето може да се продолжи на 20 дена.

Ќе мора да се затворат и божиќните саеми кои привлекуваат голем број туристи, но скијачките центри остануваат отворени за вакцинираните. Хотелите ќе се затворат, но ќе останат отворени за оние кои останале во нив пред заклучувањето, пишуваат тамошните медиуми.

„Ова беше ситуација кога треба да се реагира. Заклучувањето, релативно тежок метод, е единствената опција за намалување на бројот на инфекции овде“, изјави министерот за здравство Волфганг Муекштајн.

Владата воведе мерки за изолација на невакцинираните минатата недела, но дневниот број на новозаразени продолжи да расте далеку над бројките од претходниот врв постигнат пред една година.

Во петокот, владата објави дека повторно ќе воведе целосно заклучување и дека вакцинацијата ќе биде задолжителна од 1 февруари, потег што го спроведоа само неколку земји.

Граѓаните можат да ги напуштат домовите само доколку одат на работа или да купат основни намирници. Одењето на прошетка е дозволено без временски или далечински ограничувања, а истовремено може да се сретнат две лица од различни домаќинства.

Работните места и училиштата остануваат отворени, но владата побара од родителите да не ги испраќаат своите деца во училиштата и да ги држат дома ако е можно.