Во духот на пријателството, Франција испраќа нова Статуа на слободата во САД

Франција на 7 јуни ќе испрати нова Статуа на слободата во САД. Статуата ќе пристигне во Њујорк на 4 јули, на Денот на американската независност.

Статуата на слободата претставува историска врска помеѓу Франција и Соединетите Американски Држави, а новата статуа ќе биде висока 2,83 метри, или многу помала од нејзината голема сестра, чија висина е 46,5 метри, плус постамент од 46,9 метри, пренесуваат француските гласила.

Статуата на слободата што го краси брегот на Њујорк, Франција ја донираше на Соединетите Американски Држави во чест на првиот Ден од американската независност.

„Сакавме повторно да се поврземе со француско-американската историја“, рече амбасадорот на Франција во САД, Филип Етјен, додавајќи дека Статуата на слободата е двоен симбол, и за слободата и за добредојде“.

Француските медиуми објавија дека кога идејата за новата статуа се појавила во јули 2019 година, целта била да им се покаже на САД дека Франција останува лојална на духот на пријателството меѓу двете земји, создадени за време на заедничката историја.

Реализацијата на проектот беше одложена, поради пандемијата од Ковид-19, но проектот повторно се најде во центарот на вниманието во текот на зимата оваа година.

Свечено ќе биде обележано кога статуата ќе замине од Париз и кога ќе пристигне во Њјорк во САД.

Потоа ќе биде сместена во градината на резиденцијата на францускиот амбасадор во Вашингтон, каде ќе остане десет години.