Драматичен апел на германските научници: Политичари, под итно направете нешто

Германија со недели се бори со третиот бран на пандемијата од коронавирус и досега може да се каже дека не ја добива битката. Ова е потврдено со најновите драматични апели на водечките германски научници, Кристијан Карагијанидис и Кристијан Дростен.

Според германските медиуми, веќе неколку недели се повеќе и повеќе пациенти со Ковид-19 се префрлаат на одделенија за интензивна нега низ цела Германија, а слободни болнички кревети има се помалку.

„Ве молиме конечно да делувате“, драматично, преку „Твитер“, ги замоли германските власти Кристијан Карагијанидис, научен директор на Регистарот за интензивна нега „Диви“.

Во апелот веднаш му се придружи и водечкиот германски виролог, Кристијан Дростен, кој го опиша барањето на Карагијанидис како „итен повик за помош“.

Christian Karagiannidis ist wissenschaftlicher Leiter des #DIVI Intensivregisters. Hierher stammen die Daten zur Belegung der Intensivbetten. Dies ist ein Notruf. https://t.co/TZum0RLtnF

— Christian Drosten (@c_drosten) April 8, 2021

Во германските градови, како Бон, Бремен и Келн, едвај има слободни кревети за пациенти кои претрпеле тежок срцев удар или сообраќајна несреќа, но и за пациенти заразени со коронавирус.

„Почитувани политичари, колку повеќе треба да се зголемат бројките пред да одлучите конечно да реагирате?“, запраша Карагијанидис на „Твитер“, за што потоа објавија голем број германски медиуми.