Европскиот печат за изборите во Србија: Победата на студентите е шлаканица за Путин, но и за европските лидери

Денес, европските дневни весници оценуваат дека поразот на режимот на Александар Вучиќ на изборите, по Унгарија, е уште една шлаканица за рускиот претседател Владимир Путин, но и за Европската Унија, која со години му ласка на Вучиќ, додавајќи дека победата на студентите ќе одекне далеку надвор од границите на Србија.

Унгарскиот весник „Непсабадшаг“ пишува дека „кога еден режим е зафатен исклучиво со збогатување на својата елита, гласачите му ја испорачуваат сметката“.

Резултатот од изборите во Србија е лоша вест и за Путин“, пишува весникот. „И уште една шлаканица. Пред изборите во Унгарија тој го поддржуваше (Виктор) Орбан, во Србија ја поддржуваше партијата на Вучиќ. Во ниту еден од тие два случаи гласачите не го послушаа“, пишува „Непсабадшаг“, цитиран од веб-страницата „Јуротопикс“.

Сепак, германскиот „Цајт“ предупредува дека успехот на Студентската листа во Србија не е успех на владите на ЕУ, „кои со години му ласкаат на Александар Вучиќ“.

„Аргументот отсекогаш бил дека, кога сè ќе се земе предвид, тој е гарант за стабилноста на озлогласено нестабилниот Балкан“, пишува „Цајт“, додавајќи дека „во последните две години, последиците од тој опортунистички став на европските политичари кон Србија на Вучиќ станаа повеќе од јасни“.

Потсетувајќи дека на протестите во Србија имало знамиња на ЕУ, весникот пишува: „Со други зборови, европско движење кое нема никаква врска со Европската Унија и нејзината сегашна структура триумфираше во Србија“.

Лондонски „Фајненшл тајмс“ пишува дека по поразот на Виктор Орбан во Унгарија, поразот на Вучиќ е уште еден „изборен земјотрес што ќе одекне далеку надвор од границите“ на Србија и во исто време „пример за тоа како моќта на луѓето можат да ги надминат решителните и систематските напори на автократ да го преобликува изборниот систем во своја корист“.

„Победата на Студентската листа ѝ даде шанса на Србија да ја врати демократската контрола и рамнотежата на трите гранки на власта, да го рестартира застојаното движење кон ЕУ и да игра поконструктивна улога во Косово, во Босна и Херцеговина и во нејзиното соседство“.

Грчкиот весник „Нафтемпорики“ пишува дека студентите во Србија „ја убедиле јавноста дека протестите можат да направат разлика, дека го зедоа гневот предизвикан од трагедијата и го насочија кон политичка акција, а две години подоцна кон парламентарно мнозинство“.

„Поразот на Александар Вучиќ покажува дека систем кој долго време е доминантен може да се распадне ако го изгуби својот најголем адут – сигурноста дека нема алтернатива“, пишува „Нафтемпорики“.

Дневник додава дека отсуството на централна фигура во студентското движење, кое под одредени услови може да биде слабост, се покажа како заштита.

„Тоа ја ограничи способноста на властите да го претворат конфликтот во нешто лично, да изолираат противник или да ги претстават протестите како резултат на лични амбиции“, пишува медиумот.

Текстот Европскиот печат за изборите во Србија: Победата на студентите е шлаканица за Путин, но и за европските лидери е превземен од МАКФАКС.