Зетот на Трамп: Утре патуваме во Москва на средба со Путин

Џаред Кушнер, зетот на американскиот претседател Доналд Трамп, денеска изјави дека тој и американскиот пратеник за Блискиот Исток, Стив Виткоф, утре ќе отпатуваат за Москва на средба со рускиот претседател Владимир Путин. Оваа најава доаѓа откако трилатералните преговори во Абу Даби завршија без јасен напредок, пренесува CNN.

„Стив и јас утре патуваме за Москва за да се сретнеме со рускиот претседател Путин, да разговараме за темите што беа отворени денеска и да се обидеме да постигнеме дополнителен напредок по одредени прашања, бидејќи гледаме конкретни можности за пробив“, рече Кушнер.

Тој додаде дека, по посетата на Москва, ќе отпатува за Даблин за да се сретне со украинскиот претседател Володимир Зеленски.

За потсетување, вчера и денеска во Абу Даби се одржаа преговори меѓу претставници на САД, Русија и Украина во врска со можното завршување на војната. Ова беше прва ваква трилатерална средба по пауза од повеќе од осум месеци.

По првиот ден од преговорите, кои траеја четири и пол часа, извор близок до украинската делегација изјави за „Украинска правда“ дека е постигнат договор за голема размена на воени заробеници во блиска иднина. Сепак, немаше индикации за значителен напредок кон ставање крај на војната.

Една од главните теми беа безбедносните гаранции за Украина по евентуален мировен договор. На почетокот на разговорите, Кушнер изјави дека целта не е само да се стави крај на војната, туку и да се воспостави нова безбедносна рамка за Украина, Русија и Европа.

Една од најголемите пречки за постигнување договор останува прашањето за територијата. Рускиот претседател Владимир Путин бара контрола врз целиот Донбас, додека Украина одбива да ги повлече своите сили од областа што сè уште ја контролира.

Во пресрет на преговорите, Зеленски откри дека американски претставници го прашале дали би се согласил да ѝ го предаде Донбас на Русија во замена за безбедносни гаранции. Украинскиот претседател изрази сомнеж во однос на таков предлог, барајќи од Американците да му објаснат каква безбедност би добила Украина од тоа.

Европски претставници пристигнаа во Абу Даби, но не учествуваа директно во преговорите меѓу Русија, Украина и САД. Москва се спротивстави на нивното вклучување на преговарачката маса, додека европските земји инсистираа дека мора да учествуваат во разговорите за идната безбедност на Европа.

Текстот Зетот на Трамп: Утре патуваме во Москва на средба со Путин е превземен од МАКФАКС.