Исланд планира да го забрани ловот на китови

Во рок од две години Исланд може да го забрани ловењето китови, пишува Би-би-си.

Министерката за рибарство Свандис Сваварсдотир рече дека веќе нема оправдувања за оваа практика. Северноевропската земја, остров во северниот дел на Атлантикот, е едно од ретките места во светот каде е дозволен ловот на китови.

Но, побарувачката за месо од овие цицачи драстично опадна откако Јапонија, главниот пазар на Исланд, продолжи со комерцијалното ловење на китови во 2019 година.

Исландската министерка за рибарство вели дека ловењето китови повеќе не е профитабилно.

„Зошто Исланд да ризикува да продолжи со ловот на китови, кој не носи никаква економска добивка, за да продаде производ за кој едвај постои побарувачка?“, рече Сваварсдотир.

Министерката, која е член на Левото зелено движење, рече дека фактот што само еден кит е убиен во последните три години покажува дека оваа практика има мала економска корист за земјата. Додаде и дека ова ќе биде клучен фактор во одлучувањето дали да се продолжи со ловење китови по 2023 година.

Кога Јапонија го продолжи комерцијалното ловење на китови во 2019 година, по тридецениска пауза, тоа предизвика значителен пад на побарувачката за извоз на исландски китови, што го направи ловот помалку профитабилен.

Сваварсдотир, исто така, рече дека ловењето на китови во Исланд може да има негативно влијание врз економијата, на пример, американскиот синџир Whole Foods престанал да продава исландски производи кога се обновил ловот на китови во 2006 година.

Веста ја поздравија активистите кои со години бараат да се прекине ловењето на китови во Исланд. Во моментот, Исланд, Норвешка и Јапонија се единствените земји кои дозволуваат комерцијален лов на китови.