Москва соодветно ќе одговори на протерувањето на руски дипломати од Скопје

Портпаролката на руското МНР Марија Захарова изјави дека Москва „соодветно ќе одговори“ на денешната одлука на Скопје за протерување руски дипломати.

Претходно денеска македонските власти прогласија уште шест руски дипломати за непожелни и им дадоа рок од пет дена да ја напуштат земјата.

Министерството за надворешни работи соопшти дека денеска го поканило рускиот амбасадор во Скопје, Сергеј Баздникин и дека „му врачило дипломатска нота со која шестмина вработени во руската амбасада биле означени како непожелни лица“ во земјава.

„ Според информациите добиени од надлежните органи, тие лица извршиле активности кои се во спротивност со Виенската конвенција за дипломатски односи и треба да ја напуштат територијата на Северна Македонија во следните пет дена“, се вели во соопштението.

На 28 март беа протерани пет руски дипломати со истото образложение дека се занимаваат со активности кои се во спротивност со Виенската конвенција за дипломатски односи.