Организирана измама во центар за вакцинација во Виена

Во виенскиот „Австриски центар“, каде што илјадници луѓе секојдневно доаѓаат да ја примат вакцината против коронавирусот, полицијата открила организирана измама, пренесуваат медиумите во регионот.

На противниците на вакцинацијата во овој центар им било овозможено да добијат ковид-пасоши без да примаат вакцини.

„„Неколку црни овци“ се обиделе да се збогатат со фалсификувани потврди за вакцинација, а на противниците на вакцинацијата им биле издавани лажни пасоши за вакцинација. Тоа била организирана акција. Прво земале пари од луѓето, а подоцна, без да бидат вакцинирани, ги внесувале во системот како имунизирани“, поврдиле од „Австрискиот центар“ за тамошните медиуми.

Според написите, во оваа измама биле вмешани повеќе лица, кои работеле на различни пунктови во процесот на вакцинација.

Во посебни кабини, во пасошите за вакцинација биле внесувани печати со потврдата за вакцинација, пренесуваат агенциите.

Случајот бил откриен бидејќи кај еден администратор биле пронајдени невообичаено голем број вакцини.

Меѓу осомничените нема лекари, а откриените измамници се отпуштени и против нив е поднесена пријава, соопштиле од центарот.

Во „Австрискиот центар“ се преземени дополнителни безбедносни мерки за да не се повторат слични работи.

Докторката Ивет Закаријан за виенскиот дневен весник „Кронен цајтунг“ изјавила дека и самата била сведок дека припадник од обезбедувањето внел печат и залепил потврда во ковид-пасош.

Навела и дека имало проблеми со кражба на лекарските печати, кои исчезнале кога лекарите излегле на пауза за ручек.

Поради овој проблем воведен е нов систем, според кој печатите се бројат секојдневно и се издаваат на лекар со потпис и мора да се враќаат при секоја пауза.