Пожар во семејната куќа на британскиот премиер

Во раните утрински часови денеска, избувнал пожар во приватната куќа на британскиот премиер Кир Стармер во Северен Лондон.

Британската полиција истражува пожар во приватната куќа на премиерот Кир Стармер во северен Лондон, објави „Тајмс“, додавајќи дека никој не е повреден во инцидентот, кој бил расчистен преку ноќ и ја оштетил вратата.

Пожарникарите велат дека полицијата била алармирана од Лондонската противпожарна бригада во 1:35 часот наутро „на станбена адреса на Каунтес Роуд, NW5“.

Се верува дека адресата е семејниот дом на Кир Стармер, каде што живеел со сопругата и децата пред да се пресели на Даунинг стрит број 10 по неговата изборна победа.

„Полицијата излезе на местото на настанот. Предизвикана е штета на влезот во куќата, нема повредени. Пожарот се истражува, а кордоните остануваат на место додека трае истрагата“, соопшти полицијата.

Полицијата започна итна истрага за да се утврди причината за пожарот. Улицата „Каунтес Роуд“, каде што се наоѓа имотот, останува затворена додека трае истрагата. Жителите и сведоците беа советувани да достават какви било информации што би можеле да помогнат во истрагата.

Имотот е куќа со четири спални соби што Стармер ја купил во 2004 година и која моментално ја издава под кирија. Вредноста на куќата се проценува на околу 2 милиони фунти, пишува „Тајмс“.

Истрагата за пожарот е во тек, а властите сè уште не објавија дали инцидентот се третира како случај на подметнување пожар или несреќа.

Текстот Пожар во семејната куќа на британскиот премиер е превземен од МАКФАКС.