Полскиот претседател кај Орбан, владата во Варшава реагира остро

Полскиот претседател Карол Навроцки се сретна во Будимпешта со унгарскиот премиер Виктор Орбан, што предизвика остри критики од полската проевропска влада, која предупреди дека ваквата посета ризикува да го поткопа европското единство и оди во корист на Русија.

Состанокот на двајцата националистички и евроскептични лидери се одржал зад затворени врати, без заедничка прес-конференција или јавни изјави.

Веста дека Навроцки ќе отпатува во Будимпешта по повод Денот на полско-унгарското пријателство предизвика негодување во Варшава. Премиерот Доналд Туск ја опиша посетата како „кобна грешка и потврда на опасна стратегија што ја слабее ЕУ, а го зајакнува Путин“, нагласувајќи ги тензиите меѓу претседателот и владата.

Министерот за надворешни работи Радослав Шикорски ги доведе во прашање мотивите за посетата, повикувајќи се на ставовите на Орбан кон Русија и неговото повторено блокирање на санкциите на ЕУ кон Москва.

„Ме интересира во што е полскиот интерес да поддржува најкорумпираниот и најпропутинскиот политичар во Европа“, изјави Шикорски.

Владини претставници изразија и загриженост дека посетата може да се протолкува како индиректна поддршка за партијата Фидес на Орбан пред парламентарните избори во Унгарија следниот месец.

За време на посетата, Навроцки не даде јавна поддршка за Орбан. Претходно истиот ден, во обраќање заедно со унгарскиот претседател Тамаш Шуљок, тој истакна дека Варшава и Будимпешта не се согласуваат за сите прашања.

„За Полска, Владимир Путин и Русија претставуваат егзистенцијална закана“, изјави Навроцки.

„Полјаците ги сакаат Унгарците, а го мразат Владимир Путин, кој не е ништо друго освен воен злосторник.“

Со овие изјави тој се обиде да се дистанцира од поблагиот пристап на Орбан кон Москва, но истовремено посочи и области на согласност, како што е противењето на дел од климатските и миграциските политики на ЕУ.

Односите меѓу Полска и Унгарија, некогаш блиски сојузници во рамки на ЕУ, се влошија по целосната руска инвазија на Украина во 2022 година. Полска стана еден од најсилните сојузници на Киев, додека Унгарија често влегува во судир со Брисел околу санкциите против Русија.

И самиот Навроцки минатата година го откажа планираниот состанок со Орбан, откако унгарскиот лидер отпатува во Москва.

Навроцки е поврзан со национално-конзервативната партија Право и правда (ПиС), која беше на власт во Полска од 2015 до 2023 година и традиционално одржува блиски врски со Фидес на Орбан. Иако тие односи беа нарушени поради војната во Украина, во последно време покажуваат знаци на обновување.

Посетата на Будимпешта ги истакнува длабоките поделби во полското раководство: додека владата се стреми кон зајакнување на врските со Брисел, претседателот сигнализира отвореност за соработка со идеолошки блиски конзервативни влади во Централна Европа.

Текстот Полскиот претседател кај Орбан, владата во Варшава реагира остро е превземен од МАКФАКС.