Родум Австриец со родители од Македонија е 19-годишникот кој планирал напад во Австрија, протекоа детали за планот

Роден е во Австрија, а неговите родители се од Македонија. Кој е 19-годишникот кој е главниот осомничен за планирање на нападот за време на концерт на американската ѕвезда, Тејлор Свифт, во Виена?

Засега не е објавен неговиот идентитет, а од она што е познато тој се радикализирал преку интернет и се заколнал на верност на Исламска Држава. Негови пријатели требало да работат таму како чувари, пишува денеска австрискиот весник „Куриер“. На тој начин, тие би имале пристап до различни локации околу местото на одржувањето на концертот.

Весникот дознава дека 19-годишникот планирал да го забие својот автомобил во десетиците илјади фанови кои стоеле пред стадионот Ернст Хапел за време на концертот, а потоа да нападнат со мачети и ножеви и на крајот да активираат бомба направена од украдени хемикалии.

Се верува и дека тинејџерот тесно соработувал со 17-годишен Австриец, а се истражува и нивното опкружување.

Потврдено е дека информациите за нападот стигнале од странските тајни служби, а како што пренесоа некои американски медиуми, американските тајни служби ги информирале своите австриски колеги за опасноста.

Двајцата се уапсени вчера во Терниц и во Виена.

Текстот Родум Австриец со родители од Македонија е 19-годишникот кој планирал напад во Австрија, протекоа детали за планот е превземен од МАКФАКС.