Трамп потпиша: царините за челик и алуминиум се удвојуваат на 50 проценти

Претседателот на САД, Доналд Трамп, потпиша декрет со кој од денес се удвојуваат царините за челик и алуминиум на 50 проценти.

Во наредба издадена вчера, која стапи на сила по полноќ по локално време (6:00 часот по средноевропско време), Трамп рече дека ги зголемува тие царини за да се осигури дека увозот не ја загрозува националната безбедност.

Ова е втор пат од март да се зголемат царините за метали, клучни состојки за многу работи, од автомобили до конзервирана храна.

Трамп рече дека царините се зголемуваат за да се обезбеди иднината на американската челична индустрија.

Сепак, критичарите велат дека оваа мерка на протекционизам може да предизвика хаос кај производителите на челик надвор од САД, да предизвика одмазда од трговските партнери и да има висока цена за американските корисници на металот, пишува Би-Би-Си.

Неколку часа пред зголемувањето на царините, многу компании кои беа директно засегнати не можеа да поверуваат дека овој план ќе биде имплементиран, надевајќи се дека ќе се покаже како привремен или како некаков вид преговарачка тактика.

Кога Трамп ја потпиша наредбата, на Велика Британија ѝ беше дадено ослободување од тие мерки, оставајќи ја земјата да плаќа царини од 25 проценти за челик и алуминиум, потег за кој Трамп рече дека ги одразува тековните преговори со Соединетите Американски Држави.

САД се најголемиот увозник на челик во светот по Европската Унија, а поголемиот дел од металот се добива од Канада, Бразил, Мексико и Јужна Кореја.

Новите царини стапуваат на сила откако трговскиот претставник на Белата куќа, Џејмисон Грир, треба да се сретне со европскиот комесар за трговија, Марош Шефчовиќ, на маргините на состанокот на Организацијата за економска соработка и развој (ОЕЦД) во Париз, кој завршува денес.

Трамп ѝ се закани на ЕУ со царини од 50 проценти, обвинувајќи ја Унијата дека не преговара со добра намера.

Новите царини доаѓаат во време на силни тензии, кога 90-дневната пауза, објавена за оние царини што Трамп ги нарече „реципрочни“, истекува на 9 јули.

Портпаролката на Белата куќа, Каролин Ливит, вчера потврди дека трговскиот претставник на Белата куќа испратил писмо до сите трговски партнери на САД за да им даде „пријателски потсетник дека рокот се приближува“.

Состанок на трговските претставници на Г7 (Германија, Канада, САД, Франција, Италија, Јапонија, Велика Британија) се одржува и денес во канадското претставништво на ОЕЦД во Париз, помалку од две недели по самитот на шефовите на држави и влади на Г7 што се одржува од 15 до 17 јуни во Канада.

Текстот Трамп потпиша: царините за челик и алуминиум се удвојуваат на 50 проценти е превземен од МАКФАКС.