Трамп ќе се сретне со Зеленски во Турција: „Тој итно сака да ја заврши војната“

Американскиот претседател Доналд Трамп ќе се сретне со украинскиот претседател Володимир Зеленски во Турција за време на самитот на НАТО, за да се обиде уште еднаш да се заложи за прекин на војната во Украина, изјави денес висок американски функционер.

Се очекува Трамп да пристигне на самитот утре. Неговиот прв состанок ќе биде со домаќинот на самитот, турскиот претседател Таип Ердоган. Трамп, исто така, ќе се сретне со сирискиот претседател Ахмед ал-Шара и ќе одржи прес-конференција, соопшти Белата куќа.

Висок американски функционер, кој разговараше со новинарите под услов да остане анонимен, рече дека Трамп ќе се сретне со Зеленски во среда за да разговара за „како можеме да ја завршиме војната“. „Бојното поле очигледно е замрзнато во последните неколку месеци и ниту една страна не постигнува напредок“, рече функционерот. „Претседателот има вистинско чувство на итност да заврши со ова“, додаде тој.

Трамп разговараше со Путин
Трамп, исто така, ќе побара од сојузниците на НАТО да ги зголемат своите трошоци за одбрана. „Тој ќе ја пренесе таа порака лично“, рече функционерот. Милијарди долари во договори за одбрана ќе бидат објавени за време на самитот.

Европските претставници велат дека се надеваат дека блиските односи на Трамп со Ердоган и генералниот секретар на НАТО, Марк Руте, ќе помогнат самитот да помине непречено. Но, Европејците исто така го чувствуваат притисокот поради долготрајните трансатлантски тензии по војната со Иран и честите критики на Трамп кон НАТО.

Трамп се пожали дека членките на НАТО не направиле доволно за да им помогнат на Соединетите Држави во војната меѓу САД и Израел против Иран. Тој во саботата разговараше со рускиот претседател Владимир Путин 90 минути и понуди да помогне во наоѓањето решение за војната во Украина, изјави помошникот на Кремљ, Јуриј Ушаков вчера.

Путин не сака средба со Зеленски
Трамп во минатото се осврна на обемот на смртни случаи и уништување од двете страни. Украина успеа да го забави или запре руското напредување во последните месеци, зголемувајќи го притисокот врз Путин. Висок американски функционер рече дека Трамп веројатно ќе разговара со Путин по средбата со Зеленски.

Зеленски предложи средба еден на еден со Путин минатиот месец, но лидерот на Кремљ ја отфрли. Русија веќе изјави дека секое решение мора да вклучува преземање целосна контрола од страна на Москва врз украинскиот регион Донбас. Украина го отфрла таквото барање.

Текстот Трамп ќе се сретне со Зеленски во Турција: „Тој итно сака да ја заврши војната“ е превземен од МАКФАКС.