Украина е мета на критики поради планот припадничките на армијата да маршираат во потпетици

Планот на Украина да одржи воена парада следниот месец, на која припадничките на армијата ќе маршираат со високи потпетици, предизвика остри реакции.

Ирина Герашченко – член на опозицијата во украинскиот парламент, рече дека тоа е сексизам, а не родова еднаквост.

Според „Би-Би-Си“, властите во Киев планираат да одржат воена парада на 24 август, за да го одбележат датумот кога земјата се стекна со независност по распадот на СССР.

Министерството за одбрана соопшти дека чевлите на висока потпетица се дел од свечената униформа.

„Приказната за воената парада во потпетици е срамна“, рече воениот коментатор Витали Портников.

Пратеничката Гершченко рече дека првично сметала оти се лажни фотографиите на припаднички на армијата кои се подготвуваат за парадата во борбени панталони и црни чевли со високи потпетици.

Таа додаде дека станува збор за сексизам и го праша надлежното министерство зошто потпетиците се поважни од дизајнирањето оклоп кој е прилагоден на жените.

Потпретседателката на украинскиот парламент, Олена Кондратик, потсети дека повеќе од 13.500 жени учествувале во тековниот конфликт меѓу украинските сили и проруските сепаратисти на истокот од земјата.

Во моментов, 31.000 жени служат во украинската армија, од кои 4.000 се офицери.