Фокусот на Г7 во Париз се насочува кон Украина, додека во Абу Даби започнуваат разговори со посредство на САД

Американскиот државен секретар Марко Рубио и неговите колеги од Г7 денеска ќе разговараат за Украина и за начините на кои можат да помогнат во нејзината одбрана од Русија. Додека во Обединетите Арапски Емирати започнуваат преговори меѓу Русија, Украина и САД, министрите за надворешни работи на седумте најразвиени демократии ќе се сретнат во Франција со украинскиот министер за надворешни работи.

Украинскиот министер Андриј Сибиха ќе го започне денот со средба со Рубио во Париз, по што ќе учествува на состанок со сите министри од групата Г7 во француското Министерство за надворешни работи, пренесува АП.

Главна тема ќе биде воената и безбедносната помош за Украина, која беше намалена од администрацијата на американскиот претседател Доналд Трамп. Таа одлука предизвика загриженост во Киев, но и во европските престолнини – особено во Париз, Берлин, Рим и Лондон, чии земји се членки на Г7. Сè уште не е познато дали САД или некоја од другите членки на Г7 ќе најават нова помош за Украина.

Во исто време, пратениците на Трамп, Стив Виткоф и Џаред Кушнер, ќе се сретнат со руски и украински претставници во Абу Даби. Една од целите на разговорите ќе биде да се убеди Москва да се согласи на пошироки преговори за ставање крај на војната, која трае речиси пет години, а во кои би учествувале и клучни европски претставници.

Европа бара место на преговарачката маса
Европските држави бараат да бидат вклучени во преговорите во Абу Даби. Сепак, двајца американски претставници вчера изјавија дека претставници од Велика Британија, Германија, Франција, НАТО и Европската унија нема да учествуваат во главните преговори. Наместо тоа, пред почетокот на разговорите, тие ќе разговараат за потенцијални безбедносни гаранции и долгорочна безбедносна рамка за односите меѓу Русија и Европа.

Русија се противи на учеството на европските претставници, инсистирајќи преговорите да останат строго трилатерални – односно, меѓу Русија, Украина и Соединетите Држави. Последната таква рунда преговори се одржа во февруари. Германскиот министер за надворешни работи, Јохан Вадефул, кој вчера во Париз, на маргините на состанокот на Г7, одржа одвоена средба со Рубио, јасно стави до знаење дека Европа мора да биде вклучена во разговорите.

„Останувам многу благодарен на Соединетите Држави за вложувањето максимални напори да ги доведат спротивставените страни на преговарачката маса“, рече Вадефул. „Но, уште еднаш јасно ставив до знаење дека и Европа мора да биде на таа маса. Не постои решение без Европа – туку само со Европа“, додаде тој.

„Добро е што разговорите се обновени“
Рубио изјави дека САД немаат ништо против европските нации да се вклучат во директни преговори во одредена фаза, но смета дека за тоа сè уште не е дојдено времето. „На крајот, тоа би било позитивен развој на настаните, но претстои уште долг пат“, им рече тој на новинарите по целодневен циклус на заеднички и билатерални средби со неговите колеги од Г7. „Сепак, добро е што разговараат, добро е што трилатералните преговори се повторно започнати. Тоа е подобро отколку воопшто да нема преговори“, додаде тој.

Во пресрет на новите преговори, Русија вчера повторно изврши силен напад врз украинската електроенергетска мрежа. Истовремено, украинските сили погодија уште една од најголемите руски рафинерии за нафта. Борбите продолжуваат, а засега нема индикации дека која било од страните е подготвена да се откаже од своите барања.

Текстот Фокусот на Г7 во Париз се насочува кон Украина, додека во Абу Даби започнуваат разговори со посредство на САД е превземен од МАКФАКС.