Швајцарски медиуми: Руската вакцина против коронавирус e извозен хит

Руската вакцина против коронавирусот, „спутник В“, стана извозен хит, пишува швајцарскиот весник „Ноје цирхер цајтунг“.

Написот ги истакнува предностите на руската вакцина во однос на оние произведени од „Бионтек“/„Фајзер“ и „Модерна“. Меѓу другото, го свртува вниманието на докажаната ефикасност и начинот на нејзиното производство врз основа на добро проучена аденовирусна платформа.

Бидејќи различни носители на вирусот се користат во две дози на вакцината, нејзината ефикасност е поголема во споредба со слични вакцини според структурата, како што е „Астразенека“, истакнува авторот на статијата. Покрај тоа, весникот ја истакнува достапноста на вакцината – чини околу 10 долари за доза.

Сите овие предности на руската вакцина ја прават извозен хит, заклучуваат авторите на статијата.

Вакцината „спутник В“ претходно беше одобрена во Русија, Белорусија, Аргентина, Боливија, Србија, Алжир, Палестина, Венецуела, Парагвај, Туркменистан, Унгарија, Обединетите Арапски Емирати, Иран, Гвинеја и Тунис.