пред 3 години Германскиот канцелар Олаф Шолц во понеделникот замина за Киев за да се сретне со украинскиот претседател Володимир Зеленски во обид да покаже солидарност и да помогне да се избегне војна во Европа, откако предупреди дека руската инвазија може да биде неизбежна.
Патувањето е дел од серијата дипломатски напори за деескалација на кризата преку дијалог и закани со санкции против Русија доколку ја нападне Украина.
Шолц во вторник ќе отпатува за Москва за да се сретне со рускиот претседател Владимир Путин.
Канцеларот, кој ја презеде функцијата во декември, ја засили својата вклученост во украинската криза минатата недела, откако критичарите го обвинија дека нема лидерство во една од најлошите безбедносни кризи во Европа во последните децении, објави Ројтерс.
„Преку овие дипломатски посети, можеме да најдеме начин да обезбедиме мир во Европа“, рече Шолц за новинарите во неделата, велејќи дека распоредувањето на околу 100.000 војници на Русија на границата со Украина претставува „многу сериозна закана“.
Москва негира дека планира инвазија на Украина, но вели дека би можела да преземе неодредена „воено-техничка“ операција доколку не се исполнат низа барања, вклучително и ветувањата на НАТО дека никогаш нема да ја прифати Украина и да ги повлече силите од Источна Европа.
Извор од германската влада во неделата изјави дека Шолц и Зеленски ќе проценат каде се наоѓаат по минатонеделните разговори за „нормандскиот формат“ меѓу претставниците на Украина, Русија, Франција и Германија и како би можеле да го подобрат дијалогот.