(Видео) Единствената сестра на Адолф Хитлер за која ретко се зборува

Паула Хитлер била единствената сестра на Адолф Хитлер која го доживеала зрелото доба. Во исто време, го поминала животот во сенката на човекот што стана симбол на злото во 20. век.

За разлика од својот брат, Паула живеела повлечен и анонимен живот, настојувајќи што повеќе да се дистанцира од политиката и од нацистичкиот режим.

Родена е на 21 јануари 1896 година во Хафелдинг кај Линц, во тогашна Австро-Унгарија. Била најмладото дете на Алојз Хитлер и Клара Пелцл. Поголемиот дел од нејзините браќа и сестри починале во раното детство, па зрелото доба го доживеале само Адолф и Паула.

По смртта на таткото во 1903 и мајката во 1907 година, децата останале без родителска грижа, а нивниот однос со текот на времето се оладил.

Паула и Адолф никогаш не биле блиски. Додека Адолф ја градел својата политичка кариера во Германија, неговата сестра живеела скромно и главно надвор од јавноста. Не била членка на Националсоцијалистичката партија, ниту учествувала во политичкиот живот на Третиот Рајх. Сепак, повремено била финансиски зависна од братот, кој ѝ обезбедувал парична помош и сместување, пренесува Индекс.

Живот во сенка

Интересно е што Паула го користела презимето Волф – истиот псевдоним што Адолф повремено го користел – со цел да го прикрие својот идентитет и да избегне несакано внимание.

За време на нацистичкото владеење, Паула живеела претежно во Виена, работејќи повремени работи и избегнувајќи јавност. По завршувањето на Втората светска војна кратко била испрашувана од американските власти, но против неа не била покрената никајва постапка, бидејќи немало докази за политички или идеолошки ангажман.

Во повоените години живеела во Баварија, скромно и повлечено. Иако во приватни разговори тврдела дека го сакала братот како член на семејството, никогаш јавно не ги бранела неговите злосторства ниту политички се огласувала.

Паула Хитлер починала во Берхтесгаден, на 64-годишна возраст. Била погребана без поголеми обележја, а нејзиниот живот останал маргинална фуснота во историјата, главно поради крвното сродство со Адолф Хитлер.

Текстот (Видео) Единствената сестра на Адолф Хитлер за која ретко се зборува е превземен од МАКФАКС.