Втор ден од парламентарните избори во Русија, опозицијата обвинува за местенки

Денеска низ Русија во тек е вториот ден од парламентарните избори, а избирачките места се отвораат во 11 различни временски зони, но процесот веќе е засенет од обвинувања за измама од страна на опозициските активисти.

По затворањето на избирачките места, се очекува Русија да избере нова Дума за следните пет години, во која ќе има 450 пратеници, како и неколку нови регионални и градски администрации.

Во петокот, првиот ден од гласањето, независни набљудувачи од организацијата за права на гласачите „Голос“ забележале околу 2.000 процедурални прекршувања, во повеќето случаи со фотографии и видеа, што е показател за купување гласови.

Според извештајот на „Голос“, имало голем прилив на униформирани лица на изборите, што, според нив, покажува дека владата ги мобилизирала сите државни службеници за да обезбеди победа на владејачката партија Единствена Русија. Исто така, има и извештаи за луѓе кои гласале повеќе пати.

„Беше ужасен ден. Мрсен и валкан“, напиша на „Твитер“, Ирина Фатјанова, локална политичарка од Санкт Петербург.

Според „Голос“, Централната изборна комисија одбила да ги разгледа жалбите и едноставно ги отфрлила.

Спротивно на тоа, лидерката на Централната изборна комисија, Ела Памфилова, ја пофали организацијата на гласањето во петокот.

Владејачката Единствена Русија се обидува да го задржи апсолутното мнозинство во Думата, а партијата е поддржана од претседателот Владимир Путин, за кого изборите се важен тест за националното расположение.

На многу истакнати опозициски личности не им беше дозволено да гласаат. Меѓу нив се поддржувачи на затворениот критичар на Кремљ, Алексеј Навални, кој повика на протестно гласање против Единствена Русија од неговата казнена колонија надвор од Москва.

Тимот на Навални се пожали дека апликацијата за пораки „Телеграм“ за првпат во саботата ги блокирала изборните реклами на опозицијата.

Основачот на „Телеграм“, Павел Дуров објасни дека апликацијата е блокирана бидејќи кампањата повеќе не била дозволена во текот на изборните денови. Тој се осврна и на фактот дека „Епл“ и „Гугл“ во петокот ја отстраниле апликацијата Smart Voting од нивните руски онлајн продавници, која била дизајнирана од тимот на Навални.

Опозициски активисти ги обвинија американските технолошки гиганти и Дуров за политичка цензура.