Заврши првиот ден од преговорите во Абу Даби; Украински извор: Имаме прв значаен резултат

Првиот ден од преговорите меѓу Москва и Киев во Обединетите Арапски Емирати, насочени кон изнаоѓање трајно решение за војната во Украина, заврши по четири и пол часа, според руските државни медиуми.

Извор изјави за „Украинска правда“ дека е постигнат договор за „голема размена на затвореници во блиска иднина“.

„По првиот ден од трилатералните преговори, напорите на нашата делегација вродија со важен резултат: постигнат е договор за голема размена на затвореници во блиска иднина“, наведе извор близок до украинската делегација.

Овие мировни преговори, со посредство на САД, претставуваат прва ваква трилатерална средба во последните осум месеци, иако американскиот претседател Доналд Трамп неодамна ги зголеми очекувањата за мировен договор со своите претходни изјави за „голем, прекрасен договор“.

Претходно денеска во Москва, рускиот министер за надворешни работи Сергеј Лавров објави дека преговорите, кои се одржуваат на иницијатива на САД, ќе се фокусираат на клучните елементи на регионалната безбедносна рамка.

Безбедносните гаранции за Украина и Русија би требало да стапат на сила по „целосно и сеопфатно решавање“ на конфликтот. Тој истакна дека Русија изготвила документ со ставови за тоа како треба да изгледа идната безбедносна архитектура во евроазискиот регион.

„Русија се надева дека САД ќе бидат доволно решителни за да ги балансираат интересите на двете страни“, додаде тој.

Главниот преговарач на Украина, Рустем Умеров, изјави дека целта е постигнување траен мир. „Нашите главни приоритети се прекин на непријателствата, сигурни повоени безбедносни гаранции, економско закрепнување и развој на Украина, како и хуманитарни мерки“, објави Умеров на Телеграм.

Покрај Умеров, украинската делегација ја сочинуваат шефот на Кабинетот на претседателот Кирило Буданов, првиот заменик-министер за надворешни работи Серхиј Кислица, заменик-шефот на воената разузнавачка служба Вадим Скибицки и шефот на пратеничката група на претседателската партија, Давид Арахамија.

Главниот руски преговарач, Владимир Медински, изјави дека ставањето крај на војната е неопходно во интерес и на украинскиот и на рускиот народ. Во руската делегација се наоѓаат советникот на Путин за надворешна политика Јуриј Ушаков, замениците министри за надворешни работи Сергеј Рјабков и Михаил Галузин, како и офицери од Генералштабот, Игор Костјуков и Јуриј Шигарловски.

Последната трилатерална средба се одржа во Женева во февруари, по две претходни средби во Абу Даби.

Украинскиот претседател Володимир Зеленски, кој не е присутен во Обединетите Арапски Емирати, изјави дека Украина и нејзините партнери се подготвени конструктивно да работат „на мерки за деескалација, развој на ефективни безбедносни гаранции и напредок кон вистински мир“.

Специјалниот пратеник на Трамп, Стив Виткоф, и зетот на Трамп, Џаред Кушнер, посредуваат во преговорите. Кушнер истакна дека тензиите се високи, но изрази надеж дека дводневните разговори ќе бидат продуктивни.

„Многу од идеите за кои се разговара се развиени заедно со Европејците и Украинците“, рече тој.

Кушнер исто така напомена дека, во текот на изминатите месеци, Вашингтон водел к

Европските држави не учествуваа директно на преговарачката маса за време на трилатералните разговори, ситуација која германскиот функционер Јохан Вадепул ја опиша како „не сосема задоволителна“. Сепак, Вадепул ги окарактеризира преговорите во ОАЕ како „значаен чекор“ кон обезбедување поголемо европско вклучување во идните разговори.

 

фото/ЕПА

Текстот Заврши првиот ден од преговорите во Абу Даби; Украински извор: Имаме прв значаен резултат е превземен од МАКФАКС.