Иран тврди дека уништил американски радар во Бахреин, Вашингтон негира дека има штета

Иранската Револуционерна гарда соопшти дека на 13 ноември извршила напад врз американски радарски систем за рано предупредување во Бахреин и тврди дека постројката е уништена. Американската Централна команда (ЦЕНТКОМ), пак, ги демантираше овие наводи, соопштувајќи дека двете ирански беспилотни летала испратени кон Бахреин биле пресретнати и уништени пред да предизвикаат каква било штета.

Според соопштението на Револуционерната гарда, кое го пренесоа иранските државни медиуми, нападот бил одговор на американски воздушен удар врз телекомуникацискиот тор во градот Сирик, во јужната иранска провинција Хормозган, извршен на 12 ноември.

„Припадниците на воздухопловните сили на Корпусот на чуварите на исламската револуција го погодија и уништија радарот за рано предупредување на американските сили на островот Бахреин“, се наведува во соопштението.

Иранската воена формација испрати и предупредување до Вашингтон дека секој нов напад врз иранска територија ќе предизвика одговор, најавувајќи дека нејзините сили се подготвени да дејствуваат без географски ограничувања.

Од друга страна, американската Централна команда соопшти дека Иран испратил две ударни беспилотни летала кон Бахреин, но дека и двете биле соборени од американските сили.

„Нема повредени ниту материјална штета“, соопшти ЦЕНТКОМ, негирајќи дека радарскиот систем бил уништен.

Засега нема независна потврда за иранските тврдења за уништување на радарот.

Радарите меѓу приоритетните цели на Иран

Нападот доаѓа во време на продолжените воени судири меѓу Иран, од една страна, и САД и Израел, од друга, кои започнаа на 28 февруари. Оттогаш Техеран одговара со ракетни и беспилотни напади врз американски воени објекти и други цели низ Блискиот Исток.

Една од главните цели на иранските напади се радарските системи што ги користи американската војска за откривање и следење балистички ракети, како и за активирање на противвоздушната и противракетната одбрана.

Меѓу системите за кои во претходните извештаи се тврдеше дека биле погодени се радарите АН/ФПС-132 и АН/ТПЈ-2 во Катар, Јордан и Обединетите Арапски Емирати, како и системот АН/ФПС-117 во Саудиска Арабија.

Особено значаен е радарот АН/ФПС-132 во Катар, кој е еден од најважните американски системи за рано предупредување надвор од територијата на САД. Сепак, обемот на наводните оштетувања и оперативната состојба на овие системи не се независно потврдени.

Уништувањето или онеспособувањето на ваква инфраструктура може сериозно да ја отежне одбраната, бидејќи радарите овозможуваат навремено откривање на ракетни лансирања и следење на нивните траектории. Нивното губење го скратува времето за реакција и ја зголемува зависноста од други системи за надзор.

Фотографии открија оштетувања во американски воени бази

За последиците од иранските напади врз американската воена инфраструктура сведочат и фотографии објавени во септември од американската телевизиска мрежа Си-Би-Ес њуз. На нив биле прикажани оштетени воени објекти во Саудиска Арабија и Кувајт.

Фотографиите ги доставиле американски војници, кои побарале да останат анонимни поради ограничувањата за комуникација со медиумите.

На снимките се гледаат оштетени згради, воени возила, сместувачки објекти и авиони. Меѓу нив е и авион за радарско набљудување Е-3 „Сентри“ во воздухопловната база „Принц Султан“ во Саудиска Арабија, чиј заден дел бил тешко оштетен.

Американските војници изразиле незадоволство од степенот на заштита на воените бази и од начинот на кој јавноста била информирана за последиците од нападите.

„Ова е огромна штета нанесена на нашите бази, за која американската јавност не е информирана“, изјавил еден од војниците за Си-Би-Ес.

Бахреин е стратешки важен за американската војска

Бахреин има особено значење за американското воено присуство на Блискиот Исток, бидејќи таму се наоѓа седиштето на Петтата флота на американската морнарица, одговорна за операциите во Персискиот Залив, Арапското Море и околните поморски правци.

Дополнителен фактор за зголемените тензии е Ормускиот Теснец, низ кој минува значителен дел од светската трговија со нафта и течен природен гас.

Иран во изминатиот период се обидуваше да го ограничи поморскиот сообраќај низ овој стратешки премин, додека САД воведоа поморска блокада на иранските пристаништа.

Новиот инцидент покажува дека опасноста од повторна ескалација на судирот не е надмината. Додека Техеран тврди дека успева да погоди клучни американски воени цели во регионот, Вашингтон инсистира дека неговите одбранбени системи успешно ги пресретнуваат иранските напади.

Текстот Иран тврди дека уништил американски радар во Бахреин, Вашингтон негира дека има штета е превземен од МАКФАКС.