Нарушен воздушниот сообраќај во Италија поради дефект во системот за контрола на летање

Патниците во авионскиот сообраќај низ Италија се соочуваат со доцнења и откажувања на летовите поради технички дефект во системот за контрола на летање. Надлежните потврдија дека дефектот не е предизвикан од злонамерна намера.

Италијанската агенција за управување со воздушниот сообраќај, ENAV, соопшти дека вовела привремени ограничувања на капацитетот на воздушниот сообраќај, откако во текот на ноќта биле откриени аномалии во мрежата за пренос на податоци, која ги поддржува услугите за контрола на летање на национално ниво.

ADR, компанијата што управува со аеродромите во Рим, наведе дека „поради технички проблеми во националниот систем за контрола на летање, може да дојде до доцнења и откажувања на летовите“.

Од таму ги советуваа патниците да стапат во контакт со своите авиокомпании. Слично известување издаде и SEA, компанијата што управува со аеродромите во Милано.

Изворот на проблемот е идентификуван и во тек се активности за целосно оспособување на системот, соопшти ENAV.

Текстот Нарушен воздушниот сообраќај во Италија поради дефект во системот за контрола на летање е превземен од МАКФАКС.