Началникот на украинската армија: Напредуваме во Суми

Вооружените сили на Украина го држат непријателот на фронтот – особено во правец на Суми, каде што спроведуваат активни операции и постигнуваат успех во напредувањето и ослободувањето на украинските територии, објави Врховниот командант на вооружените сили на Украина, Олександр Сирски, на социјалната мрежа Фејсбук.

Според UNN, Сирски го напишал соопштението по состанокот на Штабот на Врховниот командант.

„Тешко е. Но, го држиме непријателот настрана. Спроведуваме активни операции во правец на Суми и постигнуваме одредени успеси во напредувањето, во ослободувањето на украинската земја“, нагласи Сирски.

Според него, единиците што учествуваат во борбените операции ќе добијат дополнителни средства.

„Според наредбата на претседателот, секоја бригада ќе добие дополнителни 7 милиони гривни (околу 145 илјади евра, оп. а.) за секој батаљон што учествува во борбени операции“, објави Врховниот командант на вооружените сили на Украина.

Тој, исто така, извести дека се подготвуваат одлуки за други потреби и прашања што беа покренати за време на работните обиколки на единиците.

Дополнително, според него, се отстранува прекумерната бирократија од армијата.

„Постапката за доделување на воините кои ги заслужиле највисоките почести ќе биде подобрена и поедноставена со цел да се избегнат непотребни административни пречки. На седницата на Штабот, се согласивме и за потребата од скратување и дигитализација на постапката за отпишување на средства“, рече Сирски.

Текстот Началникот на украинската армија: Напредуваме во Суми е превземен од МАКФАКС.