Не сме биле поблиску до војна од распадот на СФРЈ – ЕУ го чека следниот потег на Путин

„Европа не била поблиску до војна од распадот на Југославија“, мрачно коментира за Би-Би-Си неименуван висок дипломат на ЕУ, мислејќи на растечките тензии на истокот на континентот и акумулацијата на руски војници на границата со Украина.

Атмосферата во Брисел е многу напната и постои реален страв дека Европа се движи кон најтешката безбедносна криза во последните децении. Но, долготрајната војна не е единствената причина за загриженост.

Се смета дека Русија сè уште нема финансиска моќ да започне нова војна, како и дека ја нема потребната јавна поддршка. Имено, ЕУ го предупредува Кремљ дека може да има „екстремни последици“ доколку Русија одлучи да преземе воена акција во Украина.

Шведска, од друга страна, распореди стотици свои војници на стратешки важниот остров Готланд во Балтичкото Море, а Данска веќе го зајакна своето присуство во областа.

Зголемените тензии повторно ја разгореа дебатата во Финска и Шведска за тоа дали да се приклучат на НАТО.

Најголемата грижа на западните сојузници повеќе не е дали Русија ќе ја нападне Украина со конвенционален воен пристап, туку дали Москва се обидува да ја дестабилизира Европа и да ја смени политичката рамнотежа на континентот во своја полза, пишува Би-Би-Си.

Минатата година полскиот премиер Матеуш Моравјецки за британскиот сервис изјави дека Западот мора да се разбуди од геополитичкиот сон, кога намерите на Москва се доведени во прашање, пренесува „Јутарњи лист“.

Се чини дека земјите од ЕУ дефинитивно се разбудиле сега, но, според Би-Би-Си, како што често се случува кога станува збор за надворешната политика, европските лидери не се способни да се обединат кога треба да се донесе јасна одлука за тоа што да се прави во врска со руско-украинскиот конфликт.

Иако воените сили се собираат на границата, Москва негира дека планира инвазија. Тие испратија низа барања до Северноатлантската алијанса обвинувајќи ги за кршење на правилата за меѓународна безбедност.

Меѓу другото, рускиот претседател Владимир Путин бара на Украина, како и на која било друга членка на поранешниот Советски Сојуз, да и се забрани влез во НАТО.

Што ќе направи Путин сега е крајно нејасно. Западот смета дека Кремљ инвестирал премногу, и финансиски и други ресурси, за да се повлече сега, без победа или нешто слично.