Нов и досега непознат коронавирус откриен во Јапонија

Маж кој пристигнал во Јапонија од Филипините во февруари бил заразен со нов вид на коронавирус, соопшти денеска министерството за здравство на Јапонија, наведувајќи дека ова е прв случај од ваков вид.

Досега непознатиот вид на коронавирус се разликува од сојот пронајден во Велика Британија, Јужна Африка и Бразил, но се верува дека ја претставува истата закана како онаа на досегашните три многу заразни видови на Ковид-19.

Според Министерството за здравство, човекот има над 60 години и пристигнал на аеродромот Нарита во близина на Токио на 25 февруари, а станува збор за асимптоматски случај.

Тој бил позитивен на тестот кога го поминувал карантинот на аеродромот.

Националниот институт за инфективни болести повика на посилна контрола на границите во обид да се запре ширењето на коронавирусот.