Орбан: Големата лага за Украина се распаѓа во Западна Европа

Унгарскиот премиер Виктор Орбан оцени дека големата лага во врска со финансирањето на Украина се распаѓа во Западна Европа нагласувајќи дека јавното мислење почнува да се менува и дека граѓаните стануваат сè посвесни за реалните последици од ваквите политики.

Во објава на социјалната мрежа X, Орбан изјави дека, и покрај сегашната ситуација, сè уште постои надеж за решение на конфликтот. Според него, преговорите меѓу Русија и САД би можеле да доведат до прекин на огнот, па дури и до траен мир со учество на Украина.

„Во меѓувреме, во Западна Европа се разоткрива голема лага: финансирањето на овој конфликт навистина има финансиски последици. Со воведувањето закони и мерки јавното мислење се менува. Луѓето, а не елитите, ќе ја спречат Европа да влезе во војна“, рече унгарскиот премиер.

Неговата изјава доаѓа во време кога Европската Унија не успеа да постигне договор за заем за Украина, кој би бил гарантиран со замрзнати руски средства. Белгија, во чии институции се наоѓа најголемиот дел од овие средства, побара Унијата да ги сподели финансиската одговорност и потенцијалните трошоци за правните тужби што Русија би можела да ги поведе.

Потоа Брисел одобри пакет од 90 милијарди евра финансиска поддршка за Киев, кој ќе биде обезбеден преку заем од буџетот на Европската Унија.

Фото: депозитфотос

Текстот Орбан: Големата лага за Украина се распаѓа во Западна Европа е превземен од МАКФАКС.